Samukelisiwe Mbonambi
INHLOKO yeNational Prosecuting Authority Investigative Directorate (NPA ID), u-Advocate Andrea Johnson, uthe uphiko lwabashushisi luzoqhubeka nokusebenza ngaphandle kokwesaba nokuchema.
Lokhu kulandela ukuboshwa nokuvela enkantolo kwabantu abayi-7 enkantolo yamacala akhethekile eMiddelburg ngamacala enkohlakalo, ukukhwabanisa kanye nokushushumbisa imali ahlobene nenkontileka yokulawula nokusetshenziswa kwezinsimbi zika-R2.2 billion esiteshini sikagesi iKusile Power Station kwa-Eskom.
Abasolwa yilaba:
- Owayeyisikhulu esiphezulu se-SA Local Government Association (SALGA) uThabo Mokwena.
- OwayeyiChief Executive Officer yesikhashana yakwa-Eskom u-Matšhela Koko, unkosikazi wakhe, uMosima Koko, kanye namadodakazi kaKoko uKoketso Aren noThato Choma.
- Umqondisi weprojekthi yakwa-Eskom Ekusile Hlupheka Sithole.
- Abameli uJohannes Coetzee noWatson Seswai.
Okhulumela i-NPA, uSindisiwe Seboka, uchaze ukuthi amacala abhekene nalaba abayisikhombisa asukela ekuqashweni ngendlela engafanele kwenkampani yaseSwitzerland, i-Asea Brown Boveri (ABB), ukuthi yenze umsebenzi esiteshini sikagesi iKusile.
“Ukuboshwa kuka-Koko nabanye abayisikhombisa kuyisinqumo esicacile sezikhungo zomthetho kanye nokuqhubeka kokuqaliswa kwemiphumela yophenyo ye-SIU kanye nokuphathwa kwemiphumela ukuze kubuyiswe izimpahla nokulahlekelwa kwezimali okutholwe yizikhungo zombuso kanye/noma ukuvimbela ukulahlekelwa okwengeziwe.
“I-SIU isungule uhlelo lokuqulwa kwamacala omphakathi, ukubuyisela yonke imali eyalahleka ka-Esokm kubo bonke abathintekayo futhi ibenze baphendule eminye imiphumela yezokuphatha nekazwelonke kanye neyomhlaba izolandela okuhlanganisa ukufakwa ohlwini lwabangagunyaziwe kwe-ABB,” kusho okhulumela uphiko oluphenya amacala ayisipesheli uKaizer Kganyago.
