Isikhulu Esiphezulu se-Standard Bank Group, uSim Tshabalala, sivakashele eLuanda ukuyogubha lesi sigameko esiyingqophamlando nokuqinisekisa ukuzibophezela kwaleli qembu e-Angola.
LUANDA, I-Standard Bank Angola (SBA) namuhla 30 Septhemba igubhe ukwamukelwa kwamasheya ayo ukuba ahwetshwe eMakethe Yamasheya ephethwe yi-Angola Debt and Securities Exchange (BODIVA), ngomcimbi owaziwa nge-‘Ring the Bell’.
Lesi sinyathelo esiyingqophamlando sivumela ukuthi amasheya aleli bhange ahwetshwe ngokukhululeka emakethe elawulwayo, futhi siphothula uguquko lwe-SBA lokuba yinkampani ebhaliswe ngokusemthethweni emakethe yamasheya.
Lo mcimbi ubuhanjelwe ngu-Sim Tshabalala, oyi-Chief Executive Officer (CEO) ye-Standard Bank Group, okuyinto eqinisekisa ukubaluleka kwe-Angola ezinhlelweni zesikhathi eside zaleli qembu kanye nokuzibophezela kwalo ekwesekeni ukuthuthukiswa komnotho kanye nomkhakha wezezimali wakuleliya zwe.
Ukuvakasha kukaTshabalala kuphinde kwahlanganisa nemihlangano nezikhungo ezahlukene kanye nababambiqhaza, ngenhloso yokuqinisa izingxoxo mayelana nokuthuthukiswa komkhakha wezezimali, ukuheha nokukhuthaza ukutshalwa kwezimali kanye nokukhula komnotho wase-Angola ngendlela esimeme.
“Ukubhaliswa kwe-SBA emakethe yamasheya kuyisinyathelo esibalulekile ebhange kanye nasekuthuthukisweni kwezimakethe zezimali zase-Angola. Ukuba khona kwethu e-Angola isikhathi esingaphezu kweminyaka eyishumi kukhombisa ukuzibophezela kwesikhathi eside kwe-Standard Bank Group kuleli zwe kanye nasemandleni alo okukhula,” kusho uTshabalala.
“Lokhu kuhambisana nokuzibophezela esakwenza ngoMashi ngesikhathi se-Capital Markets Day, lapho sathembisa khona ukuqhubeka nokutshala izimali ezimakethe zase-Afrika ezikhula ngesivinini. Siyakwenza lokho esithe sizokwenza. Sizoqhubeka nokusebenzisana eduze namakhasimende ethu, ozakwethu kanye nababambiqhaza ukuze sisekele ukuthuthukiswa komnotho, sihehe ukutshalwa kwezimali futhi sakhe inzuzo esimeme emiphakathini esiyisebenzelayo,” kusho uSim Tshabalala, CEO we-Standard Bank Group.
Ngokungena kwayo emakethe yamasheya, i-SBA iqala isahluko esisha njengenkampani ebhaliswe emphakathini emakethe yamasheya. Lokhu kulindeleke ukuthi kuqinise ukubonakala kwayo emakethe, ukusebenzela obala kanye nobudlelwano bayo nesibalo esibanzi sabatshalizimali, ngesikhathi iqhubeka nokuzibophezela ekufakeni isandla ekukhuleni nasekuthuthukisweni kwe-Angola.
Ngokusho kuka-Luís Teles, oyi-Chief Executive Officer ye-SBA, lesi sigameko siphinde siphawule isigaba esisha ebudlelwaneni bebhange nemakethe kanye nabanikazi bamasheya.
“Umcimbi we-‘Ring the Bell’ uphawula ukuphothulwa kohlelo oluhlanganise amathimba amaningi kanye nozakwethu, futhi manje uvula isahluko esisha se-SBA. Njengenkampani ebhaliswe emakethe yamasheya, siqinisa ukuziphendulela kwethu kubanikazi bamasheya nasemakethe, ngesikhathi siqhubeka nokuholwa yimigomo esiyilandele ohambweni lwethu – ukubekezela, ukuzithiba kanye nokugxila kakhulu ezidingweni zamakhasimende ethu,” kusho uTeles.
“Singena kulesi sigaba esisha sikulungele ukuqhubeka nokukhula nokwakha inzuzo esimeme.”
Kulo mcimbi kuphinde kwabamba iqhaza i-BODIVA, okuyisikhungo esibhekele ukuphathwa kwemakethe yamasheya. Lesi sikhungo sigcizelele ukubaluleka kokwamukelwa kwe-SBA ekuthuthukiseni nasekuqiniseni izimakethe zezimali zase-Angola.
“Ukwamukelwa kwamasheya e-Standard Bank Angola ukuba ahwetshwe eMakethe Yamasheya ye-BODIVA kuphawula ukungena kwenkampani yesikhombisa kule makethe. Lokhu kuqinisa ukuzibophezela kwe-BODIVA ekwakheni imakethe yezimali eqhubeka nokuba namandla futhi ijule, ekwazi ukuhlangabezana nezidingo zokuxhaswa ngezimali kanye nokutshalwa kwezimali komnotho wase-Angola,” kusho uDkt Cristina Lourenço, oyi-Chief Executive Officer ye-BODIVA.
