ZAMA MAJOLA
UNdunankulu waKwaZulu-Natal, uThamsanqa Ntuli, ehlangene neziphathimandla zomthetho, benze isivimbamgwaqo kuMangosuthu Highway okuwumgwaqo ophithizelayo. Lesi sivimbamgwaqo besiyingxenye yemizamo kahulumeni wesifundazwe yokunciphisa izingozi zomgwaqo ezidalwa izimoto ezingekho esimweni sokuba semgwaqeni, nabashayeli abaphula imithetho yomgwaqo.
Emuva kokuphothula isivimbamgwaqo uNdunankulu uNtuli ephelezelwa uNgqongqoshe wezeMfundo uMnu. S.E. UHlomuka, uNgqongqoshe wezoLimo nokuThuthukiswa kwezindawo zaseMakhaya, uNkk Thembeni KaMadlopha Mthethwa, iPhini leMeya kaMasipala weTheku uCllr Zandile Myeni kanye neNhloko yoMnyango ebambile, uNkz Nokuthula G. Khanyile baye esikoleni Igagasi High School beyohlola amakhamera eCCTV ayingxenye yoMnyango wezokuPhepha koMphakathi nokuXhumanisa ukunqanda ubugebengu kanye nezinsiza ezinkulu zokunqanda ubugebengu ezikoleni. Umnyango umatasatasa nomkhankaso wokuqinisa ukuphepha ezikoleni kanye nokunqanda ubugebengu esifundazweni sonke.
UNdunankulu ube useqhubeka wayoba nomhlangano nezinhlaka zezokuPhepha koMphakathi eMlazi ehholo iGlebelands, waphinde wabiza Imbizo yokuvimbela ubugebengu ezinkundleni zemidlalo iGlebelands, obuhanjelwe ngamalungu omphakathi.
