ZAMA MAJOLA
Inyunyana yothisha eKZN izamukele izinhlelo zokuqinisa ezokuphepha ezikoleni esifundazweni sonke. UNdunankulu uThami Ntuli wethule uhlelo lokuphepha ezikoleni eThekwini. Uthe lolu hlelo luhlanganisa ukuqeqesha amanxusa ezokuphepha kwabafundi nokufakwa kwamakhamera eCCTV ezikoleni ezingu-20 ezifundeni zeTheku, Amajuba naseKing Cetshwayo.
Ihhovisi likaNtuli lidalule ukuthi zingaphezu kuka-2 300 izigameko zodlame, ukweba, ukusetshenziswa kwezidakamizwa kanye nobuxhwanguxhwangu ezikoleni kusukela ngoJanuwari wonyaka odlule. NgoJuni wakulo nyaka imininingwane ye-SAPS iveze ukuthi izikole zase-KZN zinezibalo eziphezulu zokubulawa kwabantu ngonyaka ka-2023/2024.
Cishe uhhafu wezigameko zokubulawa kwabantu ezingu-28 ezikoleni zenzeke esifundazweni - u-46% wazo ubandakanya udlame phakathi kwabafundi. UThirona Moodley, okhulumela iNaptosa eKZN, ukholelwa ukuthi uhlelo lukaNdunankulu lwezokuphepha luzohamba ibanga elide. "Njengabafundisi, sazi ngokujulile ukuthi izikole kumele zibe yizindawo zokukhula, ezingenakho ukwesaba nodlame" engeza.
Othisha bakujabulele ngendlela eyeqile okwethulwe uNdunankulu Ntuli baqhakambisa nokuthi bayakweseka futhi bazokwenza ngakho konke okusemandleni ukuqinisekisa ukuthi akuphazamiseki lutho ukuze kuzoqinisekiswa ukuphepha kwabafundi.
