ZAMA MAJOLA
UNgqongqoshe wezokuThuthukiswa koMphakathi, u-Sisisi Tolashe uzwakalise ukubaluleka kokubhaliswa kwabahlomula ngebhayomethrikhi kuwo wonke amahhovisi akwa-SASSA njengenye yezinhlelo ezihamba phambili ezihloselwe ukuvimba yonke imikhonyovu ohlelweni lwezibonelelo zikahulumeni. Ngaphezu kwalokhu, uthe kunezinyathelo ezikhona zokuqalisa ukubuyekezwa kwezibonelelo zikahulumeni, okuhloswe ngazo ukucacisa ukufaneleka kwabahlomula izibonelelo zikahulumeni kanye nokusiphula kwalabo abangasafaneleki.
UNgqongqoshe uthe ubuholi obuqinile ngokungangabazeki bulethe umuzwa wethemba lokukhululeka ekusindiseni imali kahulumeni esivele ibhekene nobunzima. Uncome ikhono lesikhulu esiphezulu sale nhlangano, uThemba Matlou, kanye nabaphathi bakhe ekuqinisekiseni ukuthi umphakathi unolwazi oluqhubekayo mayelana nezinguquko ohlelweni lwezibonelelo. UMatlou uthe bayabuthokozela ubuholi bale nhlangano, wathi nakuba abanye kungenzeka ukuthi abakaze balibone igalelo elikhulu likaNgqongqoshe kusukela ekuphathweni okusha, ukufika kwakhe kugqugquzele abaphathi ukuthi banikele ngakho konke okusemandleni abo ekusheshiseni ukulethwa kwezidingo kanye nokuqhubekisela phambili ukuvikelwa komphakathi kwabasengozini. UNgqongqoshe uvumile ukuthi isithunzi se-SASSA singcoliswe izinsolo zokukhwabanisa. Uphinde wagcizelela ukuthi kunezinhlelo zokusebenzisa amasu okunqanda ukukhwabanisa."Siyayibona imiphumela emiphumeleni yocwaningomabhuku, kanye nokuboshwa kwezikhulu zakwaSASSA ezenze umkhonyovu," kusho uTolashe. UTolashe wenze isiqiniseko sokuthi iSASSA igcwalisa izikhala ezibucayi kuzo zonke izifunda zayo. UNgqongqoshe uzibophezele ekuqinisekiseni ukuthi wonke amahhovisi anikezwa amandla emzamweni wokunciphisa olayini abade.
“I-SASSA isebenza ubusuku nemini ukuphothula uhlaka lwenhlangano oluzoqinisekisa ukuthi amahhovisi asezindaweni zokulethwa kwezinsiza anekhono eliphelele ukuze afeze izinsiza ezingaphazamiseki ezigidini zamaklayenti akwa-SASSA,” kusho uNgqongqoshe. Ngaphezu kwalokho, uNgqongqoshe uzwakalise ukuthi ukwenza ngcono ukusebenza kahle kwenhlangano kuzosiza kakhulu ekwenzeni ngcono ulwazi lwamakhasimende uma eya emahhovisi akwa-SASSA ukuze athole usizo.
