ZAMA MAJOLA
ISilo sakwaZulu uMisuzulu kaZwelithini sizwakalise ukungahambelani nesinqumo seNkantolo yoMthethosisekelo yakamuva esivumela amadoda ukuthi athathe izibongo zamakhosikazi awo. Lokhu sikudlulise emcimbini wokugubha usuku lwaMagugu KwaDukuza, enyakatho yeTheku ngoLwesithathu lo mhlaka 24 Septhemba. Umhlaka 24 kuMandulo (September) ugujwa yisizwe samaZulu njengosuku okwabulawa ngalo iSilo uShaka kaSenzangakhona owasungula futhi wahlanganisa isizwe samaZulu ngo-1816 ngabafowabo, okukhona kubo iNkosi uDingane, uMhlangana kanye nelungu laso uMbopha kaSithayi.
ISilo sinxuse abesilisa abangamaZulu ukuthi bawuphebeze lo mkhuba. “Ningakuvumeli lokhu, indoda ingasibiza kanjani isibongo somkakhe, ukuphela kwezwe konke lokhu,” kusho iSilo. Uthe lesi sinqumo sihlose ukudukisa isizwe, wasichaza ngokuthi siyichilo (ihlazo). “Kumele sibambelele emasikweni ethu nasendlelenu yethu yokwenza izinto eyasihola kusukela ngesikhathi seSilo uShaka nawo wonke amanye amakhosi.” IPhini likaNdunankulu wenkosi yakwaZulu inkosi Phathisizwe Chiliza naye uzwakalise ukungenami ngalesi sinqumo, udlulise nokuthi akumelanga bona njengamadoda akwaZulu aze aqale nje ethi ayela ngakuso kumele basizibe engathi asikho.
