ZAMA MAJOLA
UMnyango Wezohwebo, Izimboni kanye Nokuncintisana ubambisene neKhomishana Kazwelonke Yabathengi ekukhipheni isexwayiso esiqinile ezinkundleni zokuthenga ze-inthanethi zamazwe angaphandle ezihlulekayo ukuthobela imithetho nezimiso zaseNingizimu Afrika.
Lokhu kuza ngemuva kokuthi umnyango udalule ukuthi inkundla ye-inthanethi, uTemu ubelokhu ekhangisa ngokuthi unesitolo esizinze eNingizimu Afrika, nakuba ingenazo noma ingasebenzisi noma yiziphi izinqolobane kuleli. Le nkampani yaseShayina yaqala ukukhangisa le sitolo ngoJulayi, kodwa ngokuhamba kwesikhathi yathi isebenzisa izinkampani zesithathu ezigcina futhi zilethe izimpahla zayo eNingizimu Afrika.
Okhulumela uMnyango, uKaamil Alli, uthe, “Imisebenzi kaTemu, ngokwemvelo, kufanele ihambisane nayo yonke imithetho efanele, okuhlanganisa noMthetho Wokuvikelwa Kwabathengi, futhi ngenxa yalokhu kwethulwa kwendawo yokugcina impahla, uMnyango uzoqapha lezi zinguquko kanye nomthelela embonini yezitolo yasekhaya.
