SHEILA MHLONGO
UNgqongqoshe woMnyango wezemiSebenzi kaHulumeni neNgqalasizinda KwaZulu-Natal, uMartin Meyer, usexwayisile osonkontileka abangenzi kahle umsebenzi kahulumeni ukuthi bazokhishwa ohlwini lwezinkontileka eziqashwa uhulumeni (Blacklist).UMeyer ukusho lokhu ngesikhathi bethula isakhiwo esisha esilungisiwe eRK Khan Hospital, lomsebenzi odle isamba sika-R58 million ubungeke udluliselwe komunye usonkontileka ukube owokuqala wawuqeda ngesikhathi.
Uhulumeni wesifundazwe usunqume ukufaka ohlwini olumnyama bonke osonkontileka abashiya imisebenzi noma abangaliphothuli ngesikhathi nangaphakathi kwesabelomali. Uthe angeke kube khona enye imali yokwengeza uma umsebenzi ungapheli ngesikhathi, futhi abangaliphothuli ngesikhathi bazobhekana nesijeziso.
Uphinde waxwayisa ukuthi siphelile isikhathi sokusebenzisa izimo zezulu njengezaba sesiphelile njengoba sekuyaziwa ukuthi izimo zesimo sezishintshile ngenxa yokuguquka kwesimo sezulu (Climate Change), ngakho kufanele kube nezinhlelo ezihleliwe. Uthe uphenyo lwakamuva lukhombisa ukuthi isifundazwe sizobhekana nezimvula ezifika ku-150mm ngosuku olulodwa, okujwayeleke ukuba kube njalo kanye eminyakeni engu-50 kodwa lokhu sekwenzeke izikhathi ezi-5 ngonyaka owodwa.
Lokhu kusho ukuthi izinhlelo zokwakha kufanele zihlanganise izimo zezulu futhi kwakhiwe izibhedlela ngendlela efanele futhi ezikwazi ukubhekana nezimo ezinzima ukuze kusindiswe izimpilo.
