SHEILA MHLONGO
Njengengxenye yokubungaza ukubekezela kanye nokucijwa ngamakhono, kwentsha ebalelwa ku-50 uMasipala waseThekwini usingathe umcimbi wokuphetha uhlelo lweminyaka emithathu olwaziwa nge-Artisan’s Program.
Lo mcimbi, obubanjelwe ePinetown Civic Centre mhla zingu-30 kuMeyi 2025, ubonise igxathu elikhulu ekuzibophezeleni kukaMasipala ekunqandeni igebe lamakhono nasekwehliseni ukungasebenzi kwentsha eThekwini.
Lolu hlelo olwaziwa ngele Artisan Program, lwethulwa ngonyaka ka-2022, ngenhloso yokufundisa intsha engasebenzi amakhono abalulekile kwezobuchwepheshe afana neplumbing, electrical work, welding, bricklaying, motor mechanics, ngendlela ehlanganisa izifundo zasekilasini, ukuqeqeshwa ngokomsebenzi kanye nokubekwa ezindaweni zokusebenza, lolu hlelo lukhiqize intsha enamakhono nesilungele ukuqashwa kanye nokubamba iqhaza emnothweni wedolobha.
USihlalo weKomidi Lokuphatha Nokuthuthukiswa Kwabasebenzi, uKhansela uNkosenhle Madlala, uncome itsha ngokuphothula iziqu zayo ukukhuthala kwayo kanye nokuzimisela, wathi lo mcimbi wokuphothula kufanele ube yisisekelo sabo sokungena emsebenzini nokuzakhela ikusasa lokuzimela.
“Lo mcimbi wokuphothula uwukubungaza ikusasa lenu, amaphupho enu agcwalisekile, kanye nokwakhiwa kwamathuba emisebenzi,” esho. Umcimbi ubuhanjelwe yizikhulu ezivela eDurban University of Technology, izinhlaka ezahlukene kwezezimboni, abahlinzeki bokuqeqesha kanye nemindeni yabafundi ebigcwele ukuziqhenya.
Kukhona izinhlaka ebezivela ezinkampanini ezahlukene ebeziqhakambisa imisebenzi yazo kanye namathuba emisebenzi akhona angasiza abafundi ukuthi bathole ukuqashwa Abanye Abafundi bakhombise ukujabula bencoma indlela abasizakale ngayo kuloluhambo lwabo loqeqesho begcizelela ukuthi lolu hlelo lushintshe kanjani izimpilo zabo futhi lwavula iminyango yamathuba omsebenzi kanye nobungcweti bokuzisebenzela.
Omunye wabafudi abazigqajayo, uHlengiwe Dlamini, ubonge kakhulu uMasipala ngokumnikeza leli thuba. “Ngijoyine lolu hlelo ngingasebenzi, kodwa ngenxa yamakhono nolwazi engilutholile, manje sengingene emsebenzini njengomqeqeshi oqeqeshiwe enkampanini ehloniphekile,” esho.
UMasipala uzoqhubeka nokwethula lolu hlelo olunempumelelo futhi uhlela ukubhalisela iqembu elisha kamuva kulo nyaka emikhakheni ehambisana nezidingo zezimboni zesikhathi esizayo.
