SHEILA MHLONGO
Ngemuva kokuphothula iDurban SPAR Women’s Challenge ngempelasonto mhlaka-22 Juni, ungasheshi uhambe ngoba kuzoba nedili lomculo ozojabulisa abagijimi nababukeli eHollywoodbets Kings Park Rugby Stadium.
Izihlabani ezimbili zomculo zaseThekwini, uVeranda Panda noDJ Dlala Thukzin, bazodlala phambi nangemuva kokwabiwa kwemiklomelo. UVeranda Panda uzobe eqhulula izingoma zakhe kanti uMagic Handz (Thuthuka Zindlovu) uzodlala phakathi kwemiklomelo nemidonsiswano.
UDJ Dlala Thukzin, owakhulela eLamontville, uthandwa kakhulu ngeculo lakhe elithi iPlan, eliphumelele kakhulu eziteshini zomsakazo nezinkundla zokuxhumana. Uzojabulisa izixuku ngaphambi kokwethulwa kwemiklomelo emikhulu okuhlanganisa imiklomelo yeLucky Draw efinyelela ku-R70,000 kanye neHyundai Exter 1.2 Premium MT ebiza u-R269,900.
Abashadikazi uJane noLiam Magner, abaziwa njengeVeranda Panda, bazonandisa abantu ngomculo wabo ohlanganisa i-violin, izwi nemishini. Banochwepheshe beminyaka engu-15 futhi bahlonishwa ngezingle zabo ezifana noSugarbee, Chocolate Mermaid, nePineapple Sunday.
Indawo lapho kuphothulwa khona umgijimo izobe igcwele injabulo nomsindo womculo, ozoqinisekisa ukuthi abantu bazodansa futhi bajabule.
