ZUKISWA MTHANTI
IMeya uKhansela Felinkosi Sikhakhane ngokubambisana nethimba lakhe u-Crll. Theniwe Mbatha noSomlomo uKhansela Sfundo Masimula baphume ngobuningi babo bezobheka ukuqhubeka komsebenzi ezindaweni ezimbili ezisanda kuqala ukwakhiwa ngenhloso yokuthuthukiswa komphakathi wase Msinga.
Ukhansela Felinkosi Sikhakhane ukhombise ukugculiseka ngendlela umsebenzi oqhubeka ngayo. Okubalwa kuwo umgwaqo ohlukene izigaba ezine, olinganiselwe kwisamba sika-R6,8 million ngokwemali ozokwakhiwa ngayo. Nosonkontileka owengamale lomsebenzi uSilo Ngubane uqinisekile ukuthi kobe sekulunge konke ekupheleni kuka Septhemba.
Yize zikhona izingqinamba abahlangabezana nazo, ezenza umsebenzi wokwakha umgwaqo ubambezeleke mbijana, okubalwa kuzo imizi emibili ethintekayo ngokulungiswa komgwaqo. Okubikwa ukuthi abanikazi bemizi bebeshaya phansi ngonyawo kucaca ukuthi akuzuqhubeka lutho, bekhala ngokuthi nabo kwaba iphutha ukuthi bavume bengabonanga kahle. IMeya isithathele phezulu lesi simo yashaya phansi ngedolo yacela yaphinde yathembisa ukuthi akukho okuzothikameza indawo zabo nemizi ngenxa yokusondela komgwaqo. Baphinde bavakashela nenkundla yezemidlalo iMashunka Sports Field engaphansi kweKhansela uPhelelani Dladla.
Bakushayele izandla ukubona ukuthi nakhona umsebenzi uqhubeka ngendlela, wona olindeleke ukuthi uphothulwe ekuqaleni kuka Disemba kuwona lonyaka. Nasezinkundleni zokuxhumana ngaphansi koMsinga FM umphakathi udlulisa okukhulu ukubonga ngentuthuko abayibonayo selokhu uqalile unyaka.
