SHEILA MHLONGO
Inhlangano emukelisa ngezibonelelo zikahulumeni i-South African Social Security Agency (SASSA) KwaZulu-Natal ifisa ukwazisa umphakathi ukuthi izinsiza ehhovisi le-SASSA ePhongolo zimisiwe okwesikhashana ngenxa yengxabano eqhubekayo phakathi koMnyango Kazwelonke WezemiSebenzi Yomphakathi (NDPW) nomninindlu yalendawo.
UMnyango Kazwelonke WezemiSebenzi Yomphakathi unesibopho sokuthola nokugcina izindawo ezifanele zokusebenza ze-SASSA nezinye izinhlaka zikahulumeni. Ngeshwa, ngenxa yale ngxabano, umnikazi wesakhiwo uvale i-hhovisi le-SASSA futhi usekwenze lokhu izikhathi eziningi, okokugcina kwenzeka ngoMsombuluko, zingama-02 kuJuni 2025, futhi le ndawo ayifinyeleleki kuze kube manje.
Ukuze kuqinisekiswe ukuqhubeka kokuhlinzekwa kwezinsiza nokugwenywa kokuphazamiseka kwamakhasimende ethu abalulekile, i-SASSA ibambisene noMnyango wezokuThuthukiswa koMphakathi KwaZulu-Natal. Ngakho-ke, amakhasimende e-SASSA ayelulekwa ukuthi asebenzise iHhovisi lezokuThuthukiswa koMphakathi ePhongolo, elitholakala kuNombolo 1, eNew Republic, ePongola, 3170, ukuze athole zonke izinsiza eziphathelene ne-SASSA kuze kube kumenyezelwa kabusha.
Izikhulu ze-SASSA sezidluliswe kulezi zindawo zesikhashana ukuze kuqinisekiswe ukusizwa okuqhubekayo. Amakhasimende ayakhunjuzwa ukuthi amahora okusebenza aqala ngo-07:30 kuya ku-16:00 kusukela ngoMsombuluko kuya kuLwesihlanu. “Sisebenza kanzima, sibambisene nabathintekayo ukuze sithole isixazululo esihle nesihlala njalo esizobeka izidingo zamakhasimende ethu eqhulwini. Siyaxolisa kakhulu ngokuphazamiseka okwenzekile futhi siyabonga ngokubekezela nangokubambisana kwamakhasimende ethu ngesikhathi sale nkinga,” kusho uMphathi Wesifunda, uNkk. Thamo Mzobe.
