SHEILA MHLONGO
UMeya weTheku, ukhansela Cyril Xaba, uhole umkhankaso wokuhlobisa esikoleni iKwaMgaga High School eMlazi ngoLwesine lomhlaka-19 kuJuni, njengengxenye yokugubha iNyanga Yentsha kuMasipala.
Njengengxenye yalolu hlelo, kutshalwe izihlahla nezimbali ukuze kuhlobiswe indawo, kwahlanzwa inkundla yezemidlalo ngokusikwa utshani, kwaphinde kwalungiswa amafasitela ekilasini ayelimele.
IHhovisi Lokuthuthukiswa Kwentsha likamasipala liphinde linikele ngejezi lebhola esikoleni.
uXaba ukhuthaze abafundi ukuthi bagxile ezifundweni zabo. Uthe: “Sikhona lapha namuhla ukuzonikhuthaza ukuthi nifunde. Sizobuya futhi sivakashele lesi sikole, ngakho ngiyanincenga ukuthi niqhubeke nokusebenza kanzima.”
Usihlalo weKomidi Lokuphatha Nokuthuthukiswa Kwabantu, uKhansela uNkosenhle Madlala, uthe uMasipala uvakashele isikole ngenhloso yokubuyisela emphakathini.
Uthe: “Intsha ikusasa lethu, futhi siyabonga ngentsha yango-1976 ngokuzinikela kwayo. Manje sekusezandleni zenu ukuba nigxile ezifundweni zenu nithathe izinqumo ezinhle ngomsebenzi enifuna ukuwenza esikhathini esizayo.”
UMqondisi weKwaMgaga High School, uSithembiso Majola, ubonge uMasipala ngokuvakashela isikole nangosizo olunikeziwe.
Uthe uzinikele ekutheni baqhubeke nokusebenza kanzima ukuze bathuthukise imiphumela yabo ye-matric.
UMphathi Wohlelo Lokuthuthukiswa Kwentsha eThekwini, uNokuthula Hlophe, uthe lesi senzo sokugubha iNyanga Yentsha besenziwa kulesi sikole ngemuva kokuba bezibonile izidingo zaso ngesikhathi somkhankaso obizwa ngokuthi Back to School, owenziwa ekuqaleni konyaka.
