SBU MAMBA
IDurban City yethule abadlali abasha abayisishiyagalolunye njengoba ilungiselela ukuphila esigabeni esiphezulu sesizini ka-2025/26 ngaphansi komqeqeshi osanda kuqokwa uGavin Hunt. ICity, ebiyaziwa ngeMaritzburg United, iwine iMotsepe Foundation Championship yaphinde yakhuphukela esigabeni esiphezulu kanti isiqalile uhlelo lokuhlanganisa isikwati noDarren Keet, Brooklyn Poggenpoel noTrevor Mokwena, abadlali bayo bokuqala abasayiniswe ngokusemthethweni.
U-Keet, 35, ujoyine ngemuva kokwehlelwa yizembe kweCape Town City wadedelwa kodwa uzokwengeza ingcebo yesipiliyoni kuPremiership yaseNingizimu Afrika nase-Europe, osehlale amasizini ayisithupha eBelgium ne-KV Kortrijk no-OH Leuven. UPoggenpoel naye ujoyine njengeqembu elikhululekile ngemuva kokushiya iSuperSport United ngaphambi kokudayiswa ukuze abe yiSiwelele FC, lapho agila khona izimanga ngaphansi kukaHunt edlala indima eyisithupha eneminyaka engu-25 ubudala.
UMokwena, 24 utheleke esuka e-Upington City, lapho kubhekwe khona ukuthi ungomunye wabadlali abanekhono esigabeni sesibili futhi ngokungangabazeki ubezoyihlaba umxhwele iCity, edlale esigabeni esifanayo ngesizini edlule. Leli qembu laKwaZulu-Natal lengeze abanye abadlali abane ohlwini lwalo kanti owayekade edlala kuCity uHaashim Domingo noThabo Nodada nabo bajoyine ompetha beMotsepe Foundation.
Ngaphezu kwalokho, uKyle Jurgens ujoyine iStellenbosch FC kanti uJean Lwamba, oqokwe njengomdlali ovelele eBotswana Premier League waphinde wawina nesicathulo segolide, ujoyine esuka kuTafic FC.
U-Liam De Kock noFrederik Asare nabo bayingxenye yeqembu elibukeka lisha. “Siyajabula ukwamukela laba badlali ngesikhathi esibalulekile eqenjini. Izimfanelo zabo ezahlukene kanye nolwazi lwabo kuzobaluleka njengoba siqala lesi sahluko esisha,” kusho usihlalo weqembu uFarook Kadodia.
