IChiefs iyiqale kahle isizini entsha ithatha amaphuzu agcwele

SBU MAMBA

Ezika Shintsha Guluva Impofana abafana bokuthula noxolo babhaxabule izinsizwa zase Kapa lodumo i-Stellenbosch ngamagoli amabili eqandeni bakhala bemuka namaphuzu amathathu emdlalweni wabo wokuqala weligi obuse Athlone Stadium , igoli lokuqala lesizini lamakhosi lishaywe uNkosingiphile Ngcobo bekuyi Free Kick ngaphandle kancane  kwebhokisi wayibeka enethini uMapholoba kanti elokugcina lingene sekuyophela isiwombe sesibili , u-Omega Mdaka udlalise kabi u-Ashley Dupreez wayikhomba emlotheni uLilepo wayivalela enethini . 

IStellenbosch naso sidlale kahle ikakhulukazi ngesiwombe sokuqala bawatholile amathuba okushaya igoli lokulinganisa kodwa udonga lwasemuva lwe Chiefs oluholwa u-Inacio Miguel beluqine kakhulu bakwazile ukuvimba amafolosi eStellenbosch. Amakhosi abukeka ezoba yingozi kulesizini adlala ibhola elihle kanti nasesiswini basayinise abadlali abahle kakhulu oSphesihle Ndlovu no-Ethan Chislett , bathenge nezitobha ezinesipiliyoni uThabiso Monyane osuka ku Orlando Pirates noNkanyiso Shinga obegijima eqenjini lase Portugal i-FC Alvera .

IChiefs iqede endaweni yesishiyagalolunye ngesizini edlule yahluleka ngisho ukungena kumqhudelwano omkhulu we MTN 8 kodwa kulesizini entsha ye Betway Premiership ngathi kuzoshinstha ngampela ukudla epletini libuyile ikhosi Amakhosi ajabulile. IKaboyellow iMamelodi Sundowns eqede isizini edlule ihleli esicongweni seligi ilahle amaphuzu amabili emdlalweni wabo neChili Boys iChippa United , umdlalo uphele ngegoli elilodwa ngapha negoli elilodwa ngale kanti nase-Orlando Stadium kwesikaMaminzela isigodi azihambanga kahle izinto kuMabhakabhaka iSekhukhune United siqumbe phansi uMagebhula i-Orlando Pirates sathatha amaphuzu amathathu. Imidlalo yokuqala yeligi nemiphumela isiyonke ihambe kanje : Durban City 2 – TS Galaxy 0 , Golden Arrows 1 Siwelele FC 3 , Sekhukhune United 1 Olando Pirates 0 , Amazulu FC 1 Orbit College 0 /, Mamelodi Sundwons 1 Chippa United 1 , Kaizer Chiefs 2 Stellenbosch 0.