ZAMA MAJOLA
UNdunankulu waKwaZulu-Natal, uMhlonishwa uThamsanqa Ntuli, udlulise izincomo kwiThimba Lokubulalana Kwezepolitiki, uKhomishana wamaPhoyisa esifundazweni, uLieutenant General Nhlanhla Mkhwanazi, kanye namathimba e-SAPS esifundazweni sonke ngemizamo yabo yokulwa nobugebengu nokuvikela imiphakathi. Lokhu kuhlonishwa kulandela uchungechunge lwemisebenzi yamaphoyisa esanda kwenziwa, enomthelela omkhulu, eholwa ezobunhloli egcizelela ukuzibophezela okungaguquki kwe-SAPS kwezobulungiswa, ukuziphendulela kanye nokuphepha komphakathi. Imisebenzi ebalulekile enconyiwe ihlanganisa ukuboshwa kuka Stanley Skhosana, owayeyimenenja kuMasipala waseMzimkhulu, mayelana necala lokubulala owayeyikhansela le-ANC, uSindiso Magaqa, ngo-2017.
Ukuboshwa kukaSkhosana, okwenziwa yithimba le-SAPS Political Task Killings Task Team. Kwaboshwa nabasolwa ababili mayelana necala lokubulala ikhansela leDemocratic Alliance (DA) ngo-2023, uNhlayenza Mdlovu, owake waba nguSotswebhu kuMasipala waseMngeni. Leli yigxathu elikhulu ekuxazululeni ukubulawa kwezepolitiki okuseqophelweni eliphezulu esifundazweni. Amaphoyisa aphinde abopha abasolwa ababili ngecala lokubulala uNksz Nokulunga Happiness Mashabane obeyisikhulu kuMasipala waKwaDukuza. "Egameni likahulumeni wesiFundazwe kanye nabantu baKwaZulu-Natal, ngincoma uKhomishana wesiFundazwe uGeneral Nhlanhla Mkhwanazi nazo zonke izikhulu ezizinikele ngomsebenzi wazo, ukuzimisela kanye nesibindi. Lokhu kuboshwa kuwumyalezo ocacile ezigebengwini wokuthi awukho umgodi wokucasha. Sibuyisela imiphakathi yethu futhi sibuyisela umthetho. IKwaZulu-Natal ngeke ibe yindawo yodlame noma ubugebengu,".
UNdunankulu uNtuli ugcizelele ukuqhubeka kukaHulumeni wesiFundazwe ukubeka phambili ubulungiswa kuzisulu zodlame, ikakhulukazi abesifazane, izingane, nabaholi bezepolitiki abaqondiswe kubo. “Sizibophezele ngokugcwele ekuqedeni udlame olusekelwe ebulilini, ukubulawa kwezombusazwe, kanye nazo zonke ezinye izinhlobo zobugebengu obunobudlova. Ngeke ibe khona inkululeko yeqiniso uma imiphakathi yethu ihlezi ngokwesaba. Sinxusa zonke izakhamizi ukuthi zibike izenzo ezisolisayo, zisebenzisane nophenyo, futhi zeseke amaphoyisa ethu. Ngokubambisana singabunqoba ubugebengu, sinqamule udlame, sakhe iKwaZulu-Natal egxilile ekuthuleni, ubulungiswa kade nobumbano.” kwengeza uNtuli.
