THOBILE MBATHA
Iphephandaba lomphakathi i-KZN Namuhla esizakhele udumo ngokubungaza umcimbi weKZN Namuhla Artists Awards waminyaka yonke lapho isuke ihlonipha amaCiko asafufusa eNingizimu Afrika njengoba ihlanganisa iziFundazwe okubalwa kuzo i-KwaZulu Natali, Eastern Cape, Lesotho, Western Cape , Mpumalanga kanye neGauteng nezinye ezisezayo.
Ngokusho koMsunguli wephephandaba uNksz. Sheila Mhlongo( Mhleli) uthe, lomcimbi uzobe ubungaza unyaka wesine wabakhona ‘4th Annual’ njengoba waqalwa ngonyaka ka-2022 kanye neminyaka engu-27 iphephandaba labakhona . Inhloso enkulu ngalomcimbi ukubungaza Amagugu akithi njengoba nesiqubulo sethu sithi: “Sibungaza amaCiko ethu ngemvunulo.” yingakho siyaye sikhethe inyanga kaSepthemba njengenyanga yokugubha Amagugu. Kulonyaka sizophinde sihloniphe Amakhosi nabaholi bomphakathi ngokwehlukana kwezinhlaka zabo.” esho.
Phakathi Kwabaholi abazohlonishwa kubalwa Ingonyama Isilo sakwaMthethwa kanye neNkosi DK Ndlela waseMpendle Royalty, abaholi bezenkolo, uPastor Mfaniseni Zungu ‘we God is Good International Ministry’, Bishop Michael Mthethwa we ‘Church of Disability Movement’ kanye nabanye abavela ezinhlanganweni ezingenzi inzuzo.
Phakathi kwezikhulumi kubalwa uMnu. Thando Nyameni weKwaZulu-Natal Music Industry Association (KUMISA) lapha uzobe enikeza AmaCiko nezihambeli ngolwazi lokukhulisa ibhizinisi lezobuCiko nomculo
Eqhuba uMhleli uthe, “Yize singakabi nabo abaxhasi abaningi abazibophezele ukusebenzisana nathi kodwa lokho angeke kusiqede amandla ngoba kuyisifiso sethu njengephephandaba lomphakathi eselineminyaka engu-27 labakhona silokhu sibhala ngawo amaCiko ekhasini lethu lesithupha(page 6 ) nokuwenza akujabulele lokhu esikwenzayo ngoba siwabhalela amaProfiles ngaphandle kokulindela okuthile kepha konke sikwenza ngothando lokuthi siqhakambise amaCiko akithi asafufusa ukuze ngelinye ilanga nawo azibone esesezingeni eliphezulu njengawo wonke amaCiko esiyaye siwaphromothe siyiphephandaba lomphakathi elingenzi inzuzo”.
Ephetha uthe,” Kuyoba intokozo enkulu ukubona neminyango kaHulumeni isixhasa ukuze nathi konke esikwenzayo sikwenze kubesezingeni eliphezulu okunye nathi siyafisa eminyakeni ezayo ukuthi umcimbi wethu ubanjelwe ezindaweni ezinkulu zoMkhandlu weTheku lokho kungasijabulisa impela ngokuzithoba okukhulu sicela nibekanye nathi kulomcimbi ozobe ubanjelwe eBat Centre mhlaka-6 Septhemba ngoMgqibelo wokuqala enyangeni yamaGugu amathikithi azobe etholakala esangweni VIP 150 kanti General uR100. ukuphumelela kwenu kuyoba ukuphumelela komcimbi weKZN Namuhla Artists Awards 2025”.
