ZAMA MAJOLA
Ekhuluma ngesikhathi kugujwa uSuku lwaMagugu KwaDukuza mhlaka zingu-24 kuSepthemba, Umholi wohlangothi lwaseBuhleni ebandleni iNazareth Baptist Church, uMduduzi “Nyazilwezulu” Shembe, uphonsele isizwe inselelo yokuthi sakhe isigodlo KwaDukuza ngenhloso yokuhlonipha iSilo uShaka.
“Akwamukelekile ukuthi sihlangane lapha enkundleni sizokhumbula inkosi yethu, ngabe kuhle kakhulu uma kungathiwa sibuthene esigodlweni,” usho kanje. Inkosi uShembe iphinde yanxusa isizwe samaZulu ukuthi sithenge ipulazi KwaDukuza ukuze kuvuleke amathuba emisebenzi kubantu baso.
UNdunankulu waKwaZulu-Natal, uMnu. Thami Ntuli, unxuse abesilisa ukuthi bahole ukulwa ne-GBV esifundazweni. Uthe nesizwe kumele sisukume silwe nobugebengu. “Ukulwa nobugebengu akuwona umsebenzi wamaphoyisa wodwa, izakhamizi nazo kumele zibambe iqhaza ngoba yithi esiphila nezigebengu emphakathini,” usho kanje.
