ZAMA MAJOLA
Uphiko Oluphenya Ngamacala Aseqhulwini (i-DPCI) seluthole isamba sezimoto ezintsha ezingu-78, okuhlanganisa nezimoto ezihlomile eziwu-14, ukuze kuqiniswe impi yalo yokulwa nobugebengu obuhleliwe nobubalulekile ezweni lonke. Izimoto ezintsha ezamukeliwe kuhloswe ngazo ukuthuthukisa amandla e-DPCI okubhekana nobugebengu obuhleliwe, ukuqinisa imizamo yokuvimbela kanye nokwenza ngcono ukusebenza ngempumelelo ekulweni nobugebengu obunzima nobubalulekile ezweni lonke.
Ekhuluma emcimbini wokunikezelwa kwempahla, ibamba leNhloko kazwelonke, uLieutenant General Siphesihle Nkosi, ligcizelele ukuthi lezi zimoto zimele umjovo obalulekile wezinsiza zokuqinisa ukuphenywa kwamacala abucayi obugebengu kanye nobugebengu obuhleliwe. "Izingqinamba zokuhamba kudala zithikameza ukusebenza kahle. Izimoto manje sezizokwenza abaphenyi bakwazi ukuthola, ukucubungula kanye nokuvikela ubufakazi ngendlela eyimpumelelo, kube ngcono ukuxhumana nababambe iqhaza, ofakazi nabashushisi," kusho uNkosi. IPhini likaNgqongqoshe wamaPhoyisa uCassl Mathale uzwakalise ukubonga okukhulu ngokunikezelwa kwezimoto ku-DPCI ukuze yenze umsebenzi ewuphathisiwe. Ugcizelele ukuthi izimoto ziyizinsiza eziyivelakancane nebalulekile wanxusa amalungu ukuthi azisebenzisele inhloso yawo yokulwa nobugebengu nokuphenya.
UMathale ugcizelele ukuthi uphiko lwezindaba lukhombisa ukuzibophezela kukahulumeni ekwenzeni ngcono ukuhlinzekwa kwezidingongqangi ngokuthuthukisa amandla okusebenza. Lezi zimoto zizoqinisa ikakhulukazi imisebenzi yokulwa nobugebengu obubucayi nobunodlame, njengokugetshengwa kwezimoto ezithwala imali (CIT), ukubulawa kwamaphoyisa, nokuhlakazwa kwamaqembu obugebengu obuhleliwe. IPhini likaNgqongqoshe liphethe ngokuzwakalisa ukuqiniseka ukuthi izimoto ezintsha zizosiza ukuthi banyukele phezulu emsebenzini wabo wokulwa nobugebengu nenkohlakalo. “Ukuzinikela kwenu okungaguquki, ubungcweti kanye nothando lomsebenzi okwenza umehluko ngempela. Sebenzisa lezi zimoto ngokuzibophezela ukuvikela abasengozini, ukulwa nobugebengu obuhleliwe kanye nokusebenza ngobuqotho,” esho.
