ZAMA MAJOLA
Ezamahlathi nezindawo zokudoba kubonakala kuyizinjini ezinamandla zokuthuthukiswa kwezindawo zasemakhaya nezindawo ezisogwini, okugqugquzela ngqo ukukhula komnotho waseNingizimu Afrika. UNgqongqoshe Wezamahlathi, Ezokudoba kanye Nezemvelo, uDkt. Dion George, ugqamise indlela le mikhakha edala ngayo amathuba omsebenzi, yondla imindeni, futhi iqhuba uguquko ezindaweni ezivame ukunganakwa endabeni yokukhula kwezwe.
“Amahlathi nezindawo zokudoba akuzona izimboni ezincane, ziyizinsika zomnotho wethu, zondla imindeni, ukudala umsebenzi, kanye nokugqugquzela uguquko ezindaweni ezivame ukushiywa ngaphandle endabeni yokukhula,” kusho uNgqongqoshe. Idatha yakamuva ibonisa ukuthi ezolimo, amahlathi nokudoba kwaqopha ukukhula okuqinile ngasekupheleni kuka-2024 nasekuqaleni kuka-2025, okuhlinzeka ngokuthuthuka okubalulekile ku-GDP kazwelonke ngesikhathi lapho ezinye izimboni zibhekene nengcindezi. Njengengxenye yalolu hlelo, amasimu kaHulumeni adluliselwa emiphakathini, avula amathuba ezimbonini zokukhiqiza izingodo nokulungisa, kanye nokudala imisebenzi ezindaweni zasemakhaya.
Ngasohlangothini lwezokudoba, umnyango usuqaphele ngokusemthethweni abadobi abadobela ukuziphilisa ababalelwa ku-10 000, abahlelwe baba amadlelandawonye angu-171 ezifundazweni ezine. Umkhankaso wokuDobela inkululeko nawo uphefumulela impilo entsha emachwebeni aseNingizimu Afrika, uwaguqule abe yizikhungo zemisebenzi yezomnotho. Amachweba avuselelwe manje asekela ukucutshungulwa kwezinhlanzi, ukulungiswa kwezikebhe, ezokuvakasha kanye nokwamukela izihambi, okuqinisekisa ukuthi amadolobha asogwini aba izikhungo ezikhulayo zokukhula. “Yonke imifelandawonye iyasekelwa, kanye nechweba elivuselelwe kuwubufakazi bokuthi ukunakekelwa kwemvelo akungqubuzani nemisebenzi.
Kuyisisekelo semisebenzi,” kusho uGeorge. Wengeze ngokuthi ukukhula kwamahlathi nezindawo zokudoba kubonisa ukuthi izimboni eziluhlaza zingaletha ukuchuma kuyilapho zivikele izinsiza zekusasa. “Ngokutshala izihlahla, ukunika amandla imifelandawonye, nokuvuselela amachweba, sibonisa ukuthi iminotho yasemaphandleni neyasogwini ayilindi emngceleni. Ihamba phambili endabeni yokukhula kweNingizimu Afrika,” kusho uGeorge.
