ZAMA MAJOLA
UNdunankulu waKwaZulu-Natal, uMhlonishwa uThamsanqa Ntuli, wengamele ukunikezelwa ngokusemthethweni kukasonkontileka oqokwe ukuthi alungise ngokushesha indawo yesiShayamthetho Esidala sasoLundi. Lolu hlelo luyingqophamlando ekuzibophezeleni kukahulumeni wesifundazwe ekubuyiseleni nasekulondolozeni izindawo ezibalulekile zomlando, zamasiko nezokuphatha.
UNdunankulu uNtuli uhlanganyele noNgqongqoshe wezokuBusa ngokuBambisana neziNdaba zoMdabu, uMhlonishwa uMfundisi Thulasizwe Buthelezi, noNgqongqoshe wezeMisebenzi yoMphakathi neNgqalasizinda, uMhlonishwa uMartin Meyer, bekhombisa ubuholi obubumbene besifundazwe. Umklamo usuwonke wokuvuselela ubiza imali engaphezu kuka-R100 million kanti isigaba sokuqala sigxile ekushintsheni nasekulungiseni ingqalasizinda yophahla, okudle imali elinganiselwa ezigidini ezingu-R20. IsiShayamthetho esidala sasoLundi sisalokhu siyisizinda esisebenzayo sayo yomibili iminyango kahulumeni wesifundazwe nokazwelonke, siphinde sigcizelele ukubaluleka kokugcinwa kwaso nokuthuthukiswa kwaso.
“Le ndawo akuyona nje ibhilidi, iwuphawu lwefa laKwaZulu-Natal kanye nobuholi obunombono boMhlonishwa uMntwana uMangosuthu Buthelezi, obufuna ukusondeza uhulumeni kubantu,” kusho uNdunankulu uNtuli. Ukubuyiselwa kuzodala amathuba omnotho wendawo ngokusebenzisa izinkontileka ezincane kanye nokuqashwa, ikakhulukazi okuhlomulisa imiphakathi yasoLundi namaphethelo. UNdunankulu uphinde wanxusa imiphakathi yendawo ukuthi yeseke futhi ivikele lesi sizinda: “Nginxusa zonke izakhamuzi ukuthi zibone ukubaluleka kwalesi siza. Kuyaphoqa ukuthi imfuyo igcinwe kude nezakhiwo ukuze kugwenywe umonakalo oqhubekayo, ikakhulukazi ekubiyelweni.
Asivikele okungokwethu sonke.” UNdunankulu uNtuli uncome uNgqongqoshe uMartin Meyer ngokuzinikela kwakhe ekuletheni lolu daba phambi kwamaLungu eKomidi eliPhezulu lesifundazwe, eqinisekisa ukuthi indawo ithola ukunakwa okufanele. Lokhu kungemuva kokuthi uNgqongqoshe uMeyer egcizelele ukuthi uMnyango wezeMisebenzi yoMphakathi kanye neNgqalasizinda uzoqhubeka nezinhlelo zokuvuselela izakhiwo ezingasetshenziswa ukuze kusetshenziswe iminyango kahulumeni, okuzohlenga uhulumeni izigidi zezivumelwano zokuqashisa. UNdunankulu oHloniphekile uphinde wedlulisa ukubonga kuNgqongqoshe uMfundisi Buthelezi ngokunikela ngezimali ezidingekayo ukuze kwenziwe lo mzamo obalulekile wokubuyisela.
Esimeni esibheke phambili, uNdunankulu uNtuli umemezele ukuthi uhulumeni wesifundazwe unezinhlelo ezinkulu mayelana nalesi sikhungo, okuhlanganisa nokwakhiwa kwekolishi elisha labahlengikazi. Usonkontileka waleli kolishi useqokiwe. Ngaphezu kwalokho, iNyuvesi yaseZululand izosungula ikhempasi enwetshiwe oLundi, egcwele indawo yokuhlala yabafundi, okuzoqhubeka nokuqinisa indima yedolobha njengesikhungo semfundo nentuthuko. “Le ndawo ngeke nje ibuyiselwe kodwa izovuselelwa ukuze isize izizukulwane ezizayo, imizamo yethu lapha ingaphezu kwesitini nodaka, imayelana nesithunzi, ukulethwa kwezidingongqangi kanye nefa elihlala njalo,” kuphetha uNdunankulu.
