SHEILA MHLONGO
Amaphoyisa aseNingizimu Afrika (i-SAPS) axwayisa umphakathi mayelana nobugebengu bokukhwabanisa obuqhubekayo ezifundazweni ezahlekene obumayelana nezincwadi kanye nezingcingo ezibonakala sengathi zivela emaphoyiseni
“Lezi zincwadi ezingamanga, ezivame ukusatshalaliswa ngohlelo lwe-WhatsApp, zinophawu noma ilogo ye-SAPS futhi ziqukethe amagama, imininingwane yokuxhumana yamaphoyisa asezingeni eliphezulu kanye nekheli lamahhovisi e-SAPS angempela. Kwezinye izikhathi, abakhohlisi basebenzisa namagama eziteshi zamaphoyisa ezingekho,” kusho i-SAPS esitatimendeni.
“Abakhohlisi basebenzisa le mininingwane ukuze bakhohlise abantu ukuthi babanike imininingwane yabo siqu ngaphansi kwezizathu ezingamanga.
“Okuqukethwe kulezi zincwadi kuvame ukulungiswa kuhlangene nendawo okuyo isisulu, kuguqulwe amagama, amakheli kanye nabantu okuthiwa bangabaxhumana ukuze le ngxoxo ibonakale iyamukeleka futhi iyiqiniso.
“Futhi, le miyalezo ye-WhatsApp ivame ukuhamba phambili nezingcingo ezivela kubantu abazenza amaphoyisa, abathi amacala obugebengu avulwe isisulu. La ‘maphoyisa’ aphoqelela isisulu ukuthi sikhokhe imali ethile ukuze ‘icala’ lawo lingaqhubeki,” kusho amaphoyisa.
Izakhamizi ziyacelwa ukuthi zihlale ziqaphile ngaso sonke isikhathi:
- Ungaphenduli le miyalezo noma izingcingo zokukhwabanisa.
- Unganikezi noma uqinisekise imininingwane yakho siqu njengenombolo kamazisi, amakheli noma imininingwane yasebhange.
- Ungakhokhi imali kubakhwabanisi.
Sicela uqaphele: i-SAPS ayixhumani nomphakathi ngohlelo lwe-WhatsApp noma izingcingo ze-video.
Noma ngubani oseke wamukela noma waphendula le miyalezo noma izingcingo zokukhwabanisa, uyacelwa ukuba ayobika udaba futhi avule icala esiteshini samaphoyisa esiseduze naye. – SAnews.gov.za
