ZAMA MAJOLA
ULieutenant General Nhlanhla Mkhwanazi, uKhomishana wamaPhoyisa esiFundazweni, wabelane ngohlelo oluyizinyathelo ezintathu okuhloswe ngalo ukunciphisa ubugebengu nokugcina imiphakathi iphephile. Isinyathelo sokuqala sithi: Makwehliswe ubugebengu, amaphoyisa kumele asebenzele ukwehlisa izinga lobugebengu kodwa uMkhwanazi ube esewaxwayisa ngokuthi ukushaywa indiva kwamacala asemthethweni akwamukelekile.
Isinyathelo sesibili: Ukuziphendulela nokuhlola okuhlanzekile, zonke iziteshi zamaphoyisa kufanele zigcine ukucwaningwa kumabhuku kwezimali okuhlanzekile futhi ziziphendulele ngesenti ngalinye elitholiwe. Isinyathelo sesithathu: Ukwaneliseka komphakathi, amaphoyisa adingeka ukuthi abambe izikhathi zanyanga zonke zokuxoxisana nomphakathi futhi anikeze izibuyekezo ezijwayelekile mayelana nemizamo yamaphoyisa.
UNdunankulu uNtuli ugcizelele ukuthi osomabhizinisi kufanele basebenzisane nabomthetho besebenzisa ubuchwepheshe besimanje njengama-drones nama-CCTV ukunqanda ubugebengu. Uphinde waveza ukubaluleka kokubhekana nezindaba zomphakathi ezibanzi ukuze kwakhiwe imiphakathi ephephile. “Uma sisebenza ngokubambisana, singasishintsha lesi sifundazwe. Ukuxoxa ngobuqotho kuyisinyathelo sokuqala sokubhekana nezinselelo,” kusho uNtuli.
