ZAMA MAJOLA
UNgqongqoshe wezeMfundo eyisiSekelo, uSiviwe Gwarube, useshayele ihlombe othisha baseNingizimu Afrika njengabaqaphi besizwe, ebabiza ngomgogodla wemfundo yakuleli ethula inkulumo yakhe ku-25th National Teaching Awards eBoksburg.
UGwarube uchaze lesi sikhathi njengokubili komgubho nesibuko, esibonisa inqubekelaphambili, imizabalazo, nokubekezela kothisha baseNingizimu Afrika kule kota yekhulu edlule. “Iminyaka engamashumi amabili nanhlanu yokuhlonipha othisha. Iminyaka engamashumi amabili nanhlanu yokugubha umsebenzi wokufundisa. Iminyaka engamashumi amabili nanhlanu yokuhlonipha abesilisa nabesifazane abanikela nsuku zonke ngesikhathi, amandla nothando lwabo ekulolongeni ikusasa laseNingizimu Afrika.” Uncome ukuzinikela okungantengantengi kothisha abathi, naphezu kwezimo ezinzima, baqhubeke nokuhlonipha izimiso zokufunda nokusebenza.
“Ngezinselelo kanye nokunqoba, nina, bothisha baseNingizimu Afrika, benilokhu ningaguquki nibambe ulayini, nigcina ikilasi liphila futhi nithwele amathemba esizwe sethu emahlombe enu.” Ungqongqoshe uphinde wamemezela izinguquko ezimbalwa ezibalulekile emkhakheni wezemfundo okuhloswe ngawo ukuqinisa ukufunda okuyisisekelo, ukwandisa ukufinyelela emfundweni yezingane ezisakhula kanye nokufundisa ngobungcweti. Ukuqinisekisile ukuthi uMnyango wezeMfundo eyisiSekelo usufinyelele imigomo yawo yokubhalisa izikhungo ezingu-10 000 ze-Early Childhood Development (ECD) kusasele izinyanga ezintathu ngaphambi kwesikhathi ebesibekiwe ngaphansi kohlelo lweBana Pele.
Uthe uhlelo lwemifundaze yeFunza Lushaka lubekwe eqhulwini ukuze kuqeqeshwe othisha abaningi beSigaba Sabantu kanti uhulumeni uthuthukisa izinhlelo zokwenza uGrade R ube yimpoqo ezweni lonke. “Sizimisele ngokwenza ikilasi ngalinye libe yindawo lapho abafundi bezophumelela khona ngaphandle kokubheka isizinda sabo,” kusho uGwarube.
