ISITHOMBE: Amakhulu abafundi bakaMatikuletsheni abavela ezikoleni eziswele amathuba eThekwini bathole ithuba eliguqula impilo njengoba behlangane namathuba emisebenzi angempela kanye nezindlela zokwakha ikusasa eliqhakazile kwi-Youth Employability Indaba and Career Expo ebibanjelwe e-Durban ICC.
SHEILA MHLONGO
Inkosi Albert Luthuli International Convention Centre (Durban ICC) ibigcwele amakhulu abafundi bakaMatikuletsheni (iBanga le-12) abavela ezikoleni ezingaphezu kuka-50 ezisemalokishini nasezindaweni zasemakhaya kulo lonke elaseThekwini behlangene kwi-Youth Employability Indaba and Career Expo.
Le ngqungquthela iwuhlelo oluhlose ukubhekana nenkinga yokungasebenzi kwentsha kanye nokuvala igebe elikhona emakhonweni adingekayo emsebenzini.
Le ndawo iguqulwe yaba isikhungo samathuba, ixhumanisa intsha nemikhakha yemisebenzi yangempela, amakhono adingeka kakhulu, kanye nezimboni ezigxile esikhathini esizayo emhlabeni wedijithali oguquka njalo.
Le-Carreer Expo ibihlelwe uMasipala weTheku, kanti ibihlanganise izinhlaka ezahlukene okubalwa kuzo uhulumeni, abaholi bezinkampani ezizimele, izikhungo zemfundo ephakeme, izinkampani zobuchwepheshe bedijithali kanye nochwepheshe bezimboni, bonke bezibophezele ekuhlomiseni abafundi ngolwazi lwezemisebenzi, ulwazi lobuchwepheshe bedijithali, amakhono ayivelakancane kanye namathuba omfundaze.
Izinhlangano ebezibambe iqhaza zethule izinsiza zazo futhi zaxhumana ngqo nabafundi, zibanikela ngamathuba okuhlangana nezimo zangempela zomsebenzi kanye nezindlela ezisebenzayo zokwakha ikusasa labo.
Ekhuluma egameni leMeya yoMkhandlu waseThekwini, uKhansela Cyril Xaba, uSihlalo weKomidi Lezokuphatha Nezabasebenzi, uKhansela Nkosenhle Madlala, ugcizelele ukubaluleka kokulungiselela intsha umhlaba womsebenzi oshintsha ngesivinini esikhulu.
“Umhlaba womsebenzi ushintsha ngokushesha ngenxa yobuchwepheshe, ubuhlakani bokwenziwa ngamakhompyutha (Artificial Intelligence) kanye nemishini ezenzakalelayo. Le nkundla ihlomisa abafundi ukuze bazilungiselele imisebenzi yabo yesikhathi esizayo,” kusho yena.
Uqhube wathi ngesikhathi lapho ukungasebenzi kwentsha kuseyinselelo enkulu, izinhlelo ezifana nalezi zibalulekile ekubhekaneni nokungahambisani kwamakhono ngokuhlanganisa intsha nezidingo zezimboni kanye namathuba asafufusa.
“Lolu hlelo luqinisekisa ukuthi wonke umfundi, kuhlanganisa nabafundi abakhubazekile, uyakwazi ukuthola ulwazi, ukwesekwa kanye namathuba,” kwengeza uKhansela Madlala.
Le Ndaba ibibanjwe ngaphansi kwesiqubulo esithi “Bridging the Digital Divide: Empowering Rural and Township Schools”, igxile ekubekeni intsha, ikakhulukazi evela emiphakathini enganawo amathuba amaningi, enkabeni yamathuba, amandla okuzithuthukisa kanye nokwenza izinqumo ezinolwazi ngezindlela zemisebenzi.
Ngokusebenzisa izingxoxo ezinomthelela omkhulu, imibukiso kanye nezifundo eziholwa ngochwepheshe, abafundi bathole ulwazi olubalulekile mayelana nokukhetha imisebenzi, ukusungula izinto ezintsha ngobuchwepheshe bedijithali, amabhizinisi kanye namakhono adingekayo ukuze baphumelele emnothweni womhlaba oncintisanayo.
Kubafundi abaningi abebekhona kule Ndaba kanye ne-Career Expo, lolu hlelo lube yinto eshintsha impilo.
Omunye wabafundi, uThabile Meyiwa waseSingele High School eMfume, uthe:
“Lokhu kungivulele amehlo emathubeni ebengingazi ukuthi akhona. Manje senginethemba, indlela engingayilandela kanye nokuqonda kangcono amakhono engiwadingayo ukuze ngiphumelele. Lokhu kungikhuthaze ukuthi ngikholwe ekusaseni lami.”
Le ngosi ime njengesisusa soguquko, ivuselela izifiso, inweba umbono futhi inika amandla isizukulwane esisha ukuba sidlule izithiyo futhi sakhe ikusasa laso.
