EZITHOMBENI- Abesilisa abangu-80 ababizwa ngama-caddiesbahlolelwe umdlavuza wendlala yesinye emkhankasweni obubanjelwe eSouthbroom, KwaZulu-Natal. UJonathan Muthige, ongomunye wabasunguli beFactor of Ten Foundation.
ESITHOMBENI- Kungesikhathi amaCadies ethola ukuhlolelwe umdlavuza
SHEILA MHLONGO
SOUTHBROOM: Inhlangano iFactor of Ten Foundation yethule umkhankaso omkhulu kazwelonke wokukhuthaza abesilisa ukuba bahlolelwe umdlavuza wendlala yesinye (prostate cancer) kusenesikhathi, ngenhloso yokunciphisa izingozi ezidalwa ukungabi nolwazi nokungafinyeleli kalula ezinsizeni zezempilo.
Lo mkhankaso obizwa nge-Prostate Cancer Victory 4000 (PCV 4000) wethulwe eSouthbroom Golf Club, ogwini oluseningizimu yeKwaZulu-Natal, ngoSepthemba 2026.
Umcimbi ubuhlanganise abadlali abasiza enkundleni yegalofu, ababizwa ngama-caddies, ongoti bezempilo kanye nezinhlangano ezisebenzisana ekukhuthazeni impilo yabesilisa.
Ngokombiko okhishwe yiFactor of Ten Foundation, ama-caddies angu-86 avela ezinkundleni zegalofu ezahlukene abe yingxenye yomcimbi.
Kulaba, abesilisa abangu-80 bathole ukuhlolwa kwe-PSA, okuwukuhlolwa kwegazi okusiza odokotela ekuhloleni izinkinga ezingase zihlobane nendlala yesinye. Lokhu kuhlolwa kwenziwe ngabakwaAmpath.
UMnyango wezeMpilo KwaZulu-Natal, esifundeni sase-Ugu, nawo ubuhlinzeka ngezinsiza zezempilo ezihlanganisa ukuhlolwa komfutho wegazi, ushukela, i-cholesterol, i-HIV kanye nokunye ukuhlolwa okuhloswe ngakho ukuvikela izifo.
Kuhloswe ukufinyelela abesilisa abangu-4 000
I-PCV 4000 ihlose ukufinyelela abesilisa abangu-4 000 kuzo zonke izifundazwe eziyisishiyagalolunye zaseNingizimu Afrika ngonyaka ka-2028.
Lolu hlelo luzosebenzisa imicimbi yegalofu eyisishiyagalolunye ukusondeza ulwazi ngomdlavuza wendlala yesinye, ukuhlolwa kanye nosizo longoti bezempilo emiphakathini.
UJonathan Muthige, ongomunye wabasunguli beFactor of Ten Foundation, uthe kubalulekile ukuthi amadoda athole ulwazi oluyilo futhi akwazi ukukhuluma ngokukhululeka ngezinkinga zempilo yawo.
Uthe ukusondeza ongoti bezempilo emiphakathini kungasiza ukuqeda ukwesaba, izinkolelo ezingelona iqiniso nokungabaza okuvimbela amadoda ukuba ahlolwe kusenesikhathi.
Umdlavuza wamkhuthaza ukuba asize abanye
UMuthige wasungula le nhlangano ngokubambisana noNwabisa Muthige kulandela ukutholakala kwakhe enomdlavuza wendlala yesinye osesigabeni sesithathu (Stage 3) ngonyaka ka-2023.
Lesi sigameko samkhuthaza ukuba asize amanye amadoda ukuba athole ulwazi, ahlolwe futhi athole usizo lodokotela kusenesikhathi.
Inhlangano ibona ukuthi amadoda amaningi, ikakhulukazi lawo asebenza amahora amade futhi ahola imali encane, angase abe nobunzima bokuthola isikhathi nemali yokuya ezikhungweni zezempilo.
Ama-caddies aphakathi kwalabo abangase babhekane nalezi zinselelo ngenxa yomsebenzi wawo odinga amandla nesikhathi esiningi.
Ukubambisana kwezinhlangano
Umcimbi waseSouthbroom ubusekelwe yiTempudu NPC, Ampath kanye noMnyango wezeMpilo KwaZulu-Natal esifundeni sase-Ugu.
ISouthbroom Golf Club yona inikele ngendawo yokubambela lo mcimbi ngaphandle kokukhokhisa.
I-PCV 4000 kulindeleke ukuthi iqhubekele kwezinye izifundazwe, ngenhloso yokusabalalisa umyalezo wokuthi amadoda kufanele abeke impilo yawo eqhulwini.
Umyalezo omkhulu walo mkhankaso uthi:
“NO MAN SHOULD DIE BECAUSE HE DID NOT KNOW.”
Okungukuthi: Akufanele owesilisa asweleke ngenxa yokungabi nolwazi ngempilo yakhe.
KZN NAMUHLA COMMUNITY NEWSPAPER
