Le phrojekthi ebalulekile izoqinisa uhlelo lokuhlinzekwa kwamanzi ngobuningi, iqinisekise ukuthi kukhona ezinye izindlela zokuhambisa amanzi uma kwenzeka ukuphazamiseka, iphinde ithuthukise ukuphepha nokuthembeka kokutholakala kwamanzi ezakhamuzini ezingaba yizigidi ezingu-1.2.
Izithombe: Saneli Mthalane.
ToSHEILA MHLONGO
UMasipala weTheku wenza inqubekela phambili ebonakalayo emsebenzini wokuthuthukisa ingqalasizinda yokuhlinzekwa kwamanzi eWestville, njengoba isigaba sesithupha (Work Package 6 – WP6) sephrojekthi yokuthuthukiswa kweSouthern Aqueduct sesiphothulwe ngamaphesenti angaba ngu-82.
Lesi sigaba sihlanganisa ukufakwa kwepayipi elisha lensimbi elingamakhilomitha angu-1.85 ubude, elinobubanzi obungamamilimitha angu-1 600, elixhumanisa iSouthern Aqueduct nedamu lokugcina amanzi laseDurban Heights Water Treatment Works.
Umsebenzi wokwakhiwa kwezindawo zokuxhumanisa amapayipi kanye nengqalasizinda yamavalvu okukhipha umoya usuphothuliwe. Njengamanje, ithimba lezisebenzi limatasa lixhumanisa ipayipi elisha nengqalasizinda endala, esuswa kancane kancane ekusetshenzisweni.
Isikhulu esiphezulu esibhekele le phrojekthi, uSiduduzo Mtshali, sithe inqubekela phambili eseyenziwe kulesi sigaba iyingqophamlando emizamweni kaMasipala yokuvuselela nokwenza ingqalasizinda yokuhlinzekwa kwamanzi ibe sesimweni esingcono.
“Inqubekela phambili esiyenzile esigabeni sesithupha ibaluleke kakhulu emizamweni kaMasipala yokuthuthukisa ingqalasizinda yokuhlinzeka ngamanzi ngobuningi. Umsebenzi owenziwa eWestville ubalulekile ekuqiniseni ukusebenza kahle kweSouthern Aqueduct nasekuqinisekiseni ukuthi uhlelo lokuhlinzekwa kwamanzi luyakwazi ukumelana nezinselelo,” kusho uMtshali.
Uqhube wathi njengoba kuqhubeka ukuxhunywa kwezingxenye zamapayipi amasha, sekuyabonakala imiphumela emihle, okuhlanganisa ukuncipha kokulahleka kwamanzi obekubangelwa ukuguga kwengqalasizinda.
“Ipayipi elisha lizophinde lenyuse umthamo wamanzi ongahanjiswa, liphinde lenze kube lula ukuphatha nokusebenza kohlelo lokuhlinzeka ngamanzi ngobuningi,” echaza.
Le phrojekthi ihlose ukubhekana nenkinga yokuguga kwamapayipi amadala, ukunciphisa ukuvuza kwamanzi, ukonakala kwengqalasizinda okungalindelekile kanye nokuphazamiseka kokuhlinzekwa kwamanzi isikhathi eside.
Uma sekuphothulwe zonke izigaba zephrojekthi yokuthuthukiswa kweSouthern Aqueduct, kulindeleke ukuthi iqinise uhlelo lokuhlinzekwa kwamanzi olusiza izakhamuzi ezingaba yizigidi ezingu-1.2 ezihlala ezindaweni ezimaphakathi neziseningizimu yeTheku.
UMasipala weTheku uthi uzoqhubeka nokutshala izimali ekuvuselelweni kwengqalasizinda ukuze kuqinisekiswe ukuhlinzekwa kwamanzi okuthembekile emiphakathini eqhubeka nokukhula.
Umthombo: Uphiko Lwezokuxhumana Nezokumaketha kuMasipala weTheku.
Kunentuthuko ebonakalayo eseyenziwe esigabeni sesithupha sephrojekthi yokuthuthukiswa kweSouthern Aqueduct.p of Form
