ESITHOMBENI – UMasipala weTheku, oholwa yiMeya uKhansela Cyril Xaba, wamukele abaholi bamazwe omhlaba, abatshalizimali kanye nezithunywa zamabhizinisi emcimbini obungoMgqibelo, mhla zingama-24 kuMfumfu 2026, ngaphambi kwengqungquthela yesithathu i-reSURGEnce Durban Conference.
SHEILA MHLONGO
UMasipala weTheku uqhubeka nemizamo yokuvulela osomabhizinisi bendawo amathuba okuhwebelana namazwe omhlaba, ukuheha abatshalizimali kanye nokukhulisa umnotho, njengoba kuqhubeka ingqungquthela yesithathu i-reSURGEnce Durban Conference 2026.
Le ngqungquthela yakhela phezu kwempumelelo yezingqungquthela ezimbili ezedlule, ezafaka isamba esilinganiselwa ku-R127 million emnothweni wedolobha.
Uhlelo lwale ngqungquthela, oluthatha izinsuku ezinhlanu, luqale ngomcimbi wokwamukela izivakashi obuhlelwe yiMeya yeTheku ngoMgqibelo kusihlwa, mhla zingama-24 kuMfumfu 2026, eCoast of Dreams, eDurban Exhibition Centre.
Lo mcimbi ubuhanjelwe yizithunywa zamazwe omhlaba, abaholi bamabhizinisi kanye nabalingani bezentuthuko, ngaphambi kokuqala kwengqungquthela enkulu nombukiso wamabhizinisi.
Le ngqungquthela ihlelwe nguMasipala weTheku ngokubambisana neThe New York Christian Times, kanti iqhubeka kuze kube mhla zingama-28 kuMfumfu 2026, ngaphansi kwendikimba ethi “Decreasing Barriers by Increasing Access”, okusho ukunciphisa izithiyo ngokwandisa amathuba okufinyelela ezinsizeni nasezimakethe.
Kulindeleke ukuthi ihanjelwe yizithunywa zamazwe omhlaba ezingaphezu kwekhulu, ezivela e-United States of America, eJapan, e-Eswatini, eZimbabwe, eZambia, eUganda, eKenya naseNigeria.
Ngomhla zingama-26 nowama-27 kuMfumfu, kuzoba nengqungquthela enkulu ehambisana nombukiso lapho amabhizinisi alinganiselwa ku-150 ezokhangisa khona ngemikhiqizo nezinsizakalo zawo.
IMEYA YETHEKU IGQAMISA UKUBALULEKA KWENGQUNGQUTHELA EMNOTHWENI
Ethula inkulumo yosuku emcimbini wokwamukela izivakashi, iMeya yeTheku, uKhansela Cyril Xaba, igcizelele ukubaluleka kwale ngqungquthela ekukhuliseni umnotho nasekuvuleni amathuba emisebenzi.
UXaba uthe izingqungquthela zango-2024 nango-2025 zafaka imali elinganiselwa ku-R127 million emkhiqizweni ophelele womnotho wedolobha, zaphinde zasekela amathuba omsebenzi alinganiselwa ku-190 uma ebalwa ngokulingana nemisebenzi yonyaka wonke.
Uthe le ngqungquthela iyingxenye yemizamo yokwenza iTheku libe yisango lokungena ezimakethe zase-Afrika nezamazwe omhlaba.
“Ngale ngqungquthela i-reSURGEnce, siqinisa isikhundla seTheku njengesango lokungena ezimakethe zase-Afrika nezamazwe omhlaba, ngesikhathi sivulela osomabhizinisi bendawo amathuba okuxhumana nabatshalizimali, ukungena ezimakethe ezintsha nokwakha ubudlelwano obubalulekile kwezamabhizinisi,” kusho uXaba.
Uqhube wathi okuseqhulwini kuMasipala ukuqinisekisa ukuthi lokhu kuxhumana kuholela emathubeni angempela okukhulisa umnotho, ukuthuthukisa amabhizinisi nokudala imisebenzi esimeme.
Uthe ngokuxhumanisa amabhizinisi endawo nezikhungo zamazwe omhlaba, idolobha liqhubekisela phambili ukukhula komnotho okubandakanya wonke umuntu, liphinde liqinise isikhundla seTheku njengendawo ekahle yabatshalizimali.
OSOMABHIZINISI BATHOLA AMATHUBA OKWAKHA UBUDLELWANO NAMAZWE OMHLABA
Ucwaningo olwenziwa ukuhlola umthelela wezingqungquthela ezedlule luveze ukuthi ukuxhumana phakathi kosomabhizinisi kube nomthelela omuhle.
Amabhizinisi abuzwa ocwaningweni lwango-2025 aveze ukuthi akwazi ukuthola abantu nezinkampani ezingaba wusizo ekukhuliseni amabhizinisi awo, ngokusebenzisa imihlangano yokuxhumana phakathi kwamabhizinisi, eyaziwa nge-Business-to-Business (B2B).
Amanye amabhizinisi aveze ukuthi asaqhubeka nezingxoxo nabangase babe ngabalingani bawo kwezamabhizinisi.
UDennis Dillon, ongomunye wabasunguli bale ngqungquthela futhi ongumxhumanisi wayo e-United States, uthe ukuletha abatshalizimali nezithunywa zamazwe omhlaba eThekwini akugcini ngokuvula izimakethe kuphela, kodwa kuphinde kuvule amathuba okuthuthukisa amakhono abantu nokuxhumanisa izinto ezintsha ezisungulwa endaweni nemali yabatshalizimali bamazwe omhlaba.
Uthe izithunywa zamazwe omhlaba sezikhombise intshisekelo yokutshala imali emikhakheni eyahlukene yaseThekwini, okubalwa kuyo ukuthuthukiswa kwezindawo nezakhiwo, ezolimo, ukucutshungulwa kokudla, ezamandla kanye nezokukhiqiza.
Kuphinde kwabonakala intshisekelo emikhiqizweni ekhiqizwa e-Afrika.
KUZODINGIDWA AMATHUBA OKUTSHALA IZIMALI NOKUTHUTHUKISA AMABHIZINISI
Ingqungquthela enkulu nombukiso kuzogxilwa emikhakheni ehlukahlukene ebalulekile ekuthuthukisweni komnotho.
Phakathi kwezihloko okuzodingidwa ngazo kubalwa ukutshalwa kwezimali, ukuhwebelana phakathi kwamazwe ase-Afrika kanye nabantu bomdabu wase-Afrika abahlala kwamanye amazwe, ukutholakala kwezimali zokuxhasa amabhizinisi kanye namathuba okuthola izinkontileka zokuhlinzeka ngemikhiqizo nezinsizakalo.
Kuzophinde kugxilwe ekuthuthukisweni kwamabhizinisi aphethwe ngabesifazane nentsha, ubuhlakani bokwenziwa (Artificial Intelligence – AI), ezobuchwepheshe, ukusungulwa kwezindlela ezintsha zokusebenza, ezolimo, ukucutshungulwa kwemikhiqizo yezolimo, ezokukhiqiza, ezamandla, ukuthuthukiswa kwezakhiwo, ezokuvakasha kanye nomnotho wezobuciko.
Kuzoba nemihlangano ekhethekile eyaziwa nge-Deal Rooms, lapho abatshalizimali nosomabhizinisi bezoxoxisana khona ngamathuba okubambisana nokutshala izimali.
Ngomhla zingama-28 kuMfumfu, kuzoba nemihlangano yokuxhumanisa amabhizinisi endawo nawamazwe omhlaba, ngenhloso yokuhlola amathuba okuhwebelana nokusungula ubudlelwano obusha kwezamabhizinisi.
KUGQAMISWA NEQHAZA LABAHOLI NEMIPHAKATHI EKUVUSELELENI UMNOTHO
Uhlelo lwale ngqungquthela luphinde lwahlanganisa ingxoxo ebizwa nge-Economic Revival Dialogue, ebihlelelwe umhla zingama-25 kuMfumfu 2026.
Le ngxoxo ibigxile ekubalulekeni kokholo, ubuholi, ukuhlomisa imiphakathi ngamathuba kanye nokuletha uguquko emnothweni.
UMasipala weTheku uthi le ngqungquthela iyingxenye yemizamo yawo yokukhuthaza ukutshalwa kwezimali, ukuqinisa ubudlelwano bamazwe omhlaba nokuvulela amabhizinisi endawo amathuba okukhula.
Abafisa ukuthola eminye imininingwane bangavakashela isizindalwazi esithi www.reSURGEnceConference.com noma balandele ikhasi elithi @reSURGEnceConference ezinkundleni zokuxhumana.
Lo mcimbi ubugxile ekuqiniseni ubudlelwano bamazwe omhlaba, ekwandiseni amathuba okuhwebelana nokutshalwa kwezimali, kanye nokuvulela amabhizinisi ase-Afrika amathuba okukhula.Ingqungquthela iqhubeka kuze kube mhla zingama-28 kuMfumfu 2026 eDurban Exhibition Centre.
Umthombo: UMnyango Wezokuxhumana Nokumaketha kuMasipala weTheku.
