Nonduduzo Ngcongo
IPhini likaNgqongqoshe wezeMfundo ePhakeme, uDkt Mimmy Gondwe, lihole ithimba ebelivakashele esikhungweni iMkhumbane Entrepreneurship Support Centre, eCato Manor, ngomhla ka-29 Novemba ukuyohlola ukuthi luqhubeka kanjani uhlelo iFurniture Manufacturing and Upholstery Skills Development Training Programme. IPhini liaNgqongqoshe beliphelezelwe yikhansela lakuWadi 29 uKhansela Bhekisisa Mngadi ne-CEO yeFiber Processing and Manufacturing Sector Education and Training Authority (FP&MSETA), uDkt Felleng Yende.
Inhloso yalolu hambo bekuwukuhlola umthelela walolu hlelo oluqhubekayo oluhlinzeka ngamakhono abalulekile emkhakheni wokukhiqiza ifenisha. Ngemuva kokuhlola lesi sikhungo, iPhini likaNgqongqoshe uGondwe lihlabeke umxhwele ngefenisha enhle, esezingeni eliphezulu eyakhiwe ngabafundi abawu-60 abakulolu hlelo njengamanje.
“Engikubone namhlanje kuhle ngendlela eyisimanga futhi kuyakhuthaza. Ngemuva kokuzwa engikuxoxelwe ngabakulolu hlelo, ngingakusho kugcwale umlomo ukuthi ukuthuthukiswa kwamakhono yiwona khiye omkhulu ekwakhiweni kwamathuba omsebenzi nokuqeda ububha emiphakathini,” uphawule kanje.
IPhini likaNgqongqoshe liphinde lagcizelela ukubaluleka kokusebenza ngokubambisana, lacela izinkampani ezizimele ukuthi zilweseke lolu hlelo. “Ngiyathanda ukubona abantu besifazane bethuthukiswa, ikakhulukazi abantu besifazane abasebasha. Okungijabulisa kakhulu ngalolu hlelo wukuthi iningi labakulona ngabesifazane abahamba phambili kulo mkhakha obekugcwele kuwo abesilisa,” usho kanje.
Lolu hlelo oselusonyakeni wesithupha seluqeqeshe abantu abangaphezu kuka-150, iningi labo okuyintsha nabesifazane. Kulaba, cishe amaphesenti awu-70 aseqale amabhizinisi awo aqasha okungenani abantu abathathu. Omunye walaba osephumelele nguMatho Mathenjwa owasungula iFeel in Heaven Design. Ngemuva kokuthola uxhaso ohlelweni lukahulumeni wesifundazwe, i-Operation Vula Programme, kuthe lapho uMathenjwa esephothule ukuqeqeshwa, wakhulisa ibhizinisi lakhe kanti manje useqashe abantu abangaphezu kuka-10. Uthe uyabonga ngalolu sizo olumsize ukuthi akhulise ibhizinisi lakhe.
“Ngithole uR200 000 ongisize ngaqala ibhizinisi lami, ngalikhulisa laze lafika lapho likhona namhlanje,” usho kanje.
UKhansela Mngadi uluncomile lolu hlelo, wathi luhambisana nenhloso kaMasipala yokufukula imiphakathi ngokuyisiza iqale amabhizinisi.
Kulo nyaka, lolu hlelo luqeqesha abantu abasha abawu-60, abawu-30 babo abaphothula izifundo zezinyanga ezintathu nabawu-30 abasohlelweni lonyaka owodwa lokufundela umsebenzi. Lolu hlelo olwenziwa ngokubambisana phakathi koPhiko lokweSekwa kamaBhizinisi lukaMasipala weTheku, i-FP&MSETA, neMy Space Academy, lukhuthaza ukwakhiwa kwamathuba omsebenzi namathuba okuzisebenza.
