ESITHOMBENI- Umfanekiso wePaki ezokwakhiwa eThekwini
SHEILA MHLONGO
UMasipala weTheku usumemezele inqubekelaphambili enkulu ohlelweni lokwakhiwa kwepaki elisha lokuzithokozisa, iDurban Amusement Park, elizokwakhiwa endaweni okwakukhona kuyo iDurban Funworld ngasolwandle eThekwini.
Lolu hlelo, okulindeleke ukuthi ludle imali elinganiselwa ku-R980 million, seluthole imvume yoxhaso lwemali yokuthuthukiswa kwephrojekthi esikhungweni esixhasa ngezimali intuthuko.
Lokhu kuyisinyathelo esibalulekile esisondeza iphrojekthi ekutheni kuqalwe ukwakhiwa kwepaki elizoba nezindawo ezahlukene zokuzijabulisa, imidlalo kanye nezindawo zokungcebeleka zemindeni.
UMnyango Wezokuvakasha kuzwelonke nawo usuyifake le phrojekthi phakathi kwezinhlelo ezibalulekile zokuthuthukisa ingqalasizinda yezokuvakasha eNingizimu Afrika.
Ukwakhiwa kwepaki kulindeleke ukuthi kuqale ngo-2027
Ngokusho kukaMasipala weTheku, umsebenzi wokudweba nokuhlela ukuthi ipaki lizokwakhiwa kanjani usuphothuliwe, kanti sekuyenzeka amalungiselelo obuchwepheshe.
Kulindeleke ukuthi izinqubo zokuthola izimvume ezidingekayo ngokomthetho ziqhubeke kuze kube sekupheleni kwezinyanga ezintathu zokuqala zonyaka ka-2027.
Ukwakhiwa kwepaki kuzolandela uma seziphothuliwe lezi zinqubo.
Ukugunyazwa koxhaso kukhombisa ukuthi izikhungo zezimali zinethemba lokuthi le phrojekthi ingaphumelela futhi ibe negalelo ekuthuthukisweni komnotho wedolobha.
Ipaki lizokwakhiwa lapho kwakukhona iFunworld
Leli paki elisha lizokwakhiwa endaweni eyayaziwa ngeDurban Funworld, eyavalwa ngemva kweminyaka eminingi ijabulisa imindeni nezivakashi ezazivakashela eThekwini.
Indawo izothuthukiswa ngaphansi kwesivumelwano sesikhathi eside sokuqashiswa komhlaba nguMasipala weTheku.
Ipaki elisha kulindeleke ukuthi libe nezinto zokuzijabulisa ezisezingeni lomhlaba, okuhlanganisa:
- Imishini yesimanje yokugibela nokuzijabulisa yabantu abadala nezingane.
- Izindawo zemidlalo esebenzisa ubuchwepheshe besimanje bedijithali.
- Izitolo ezahlukene lapho izivakashi zizokwazi ukuthenga khona.
- Indawo ethuthukisiwe yokubukela imicimbi, amakhonsathi neminye imibukiso.
- Izindawo zokuzijabulisa ezingaphakathi kwezakhiwo nangaphandle.
Lokhu kuzokwenza ukuthi ipaki likwazi ukusebenza unyaka wonke, ngisho nangezinsuku zemvula noma ngezikhathi zakusihlwa.
Kulindeleke amathuba emisebenzi angu-1 400
Enye yezinzuzo ezinkulu zale phrojekthi ukudalwa kwamathuba emisebenzi.
Ngokusho kukaMasipala, kulindeleke ukuthi kudaleke imisebenzi elinganiselwa ku-1 400 ngesikhathi kwakhiwa ipaki nalapho seliqalile ukusebenza.
Amabhizinisi amancane endawo nawo kulindeleke ukuthi ahlomule ngokuhlinzeka ngemikhiqizo nezinsiza ezizodingeka kuleli paki.
Lokhu kuzoba nomthelela omuhle ekuthuthukisweni komnotho waseThekwini nasekudalweni kwamathuba kubantu bendawo.
Kuzothuthukiswa ezokuvakasha eThekwini
Indawo edume ngokuthi iGolden Mile, esogwini lolwandle eThekwini, iheha ukuvakashelwa kwabantu okungaphezu kwezigidi ezingu-17 ngonyaka.
UMasipala uthi ipaki elisha lizokwenza ukuthi izivakashi zichithe isikhathi eside edolobheni, ziphinde zibuye kaningi.
Lokhu kulindeleke ukuthi kuhlomulise amahhotela, izindawo zokudlela, izitolo kanye namanye amabhizinisi ancike kwezokuvakasha.
Le phrojekthi iyingxenye yezinhlelo zokutshalwa kwezimali ezingaphezu kuka-R2 billion osezisetshenzisiwe noma osezibekelwe ukuthuthukisa ugu lwaseThekwini.
Iphrojekthi iphinde yathola ukuqashelwa kuzwelonke ngesikhathi ikhethwa nguMnyango Wezokuvakasha ohlelweni lwawo lwango-2026 lokweseka amaphrojekthi ezokuvakasha.
Iphinde yethulwa engqungqutheleni yezokutshalwa kwezimali kwezokuvakasha, iSouth African Tourism Investment Summit.
UMasipala weTheku uthi uzoqhubeka nokusebenzisana nabathintekayo ukuze kuqinisekiswe ukuthi zonke izinqubo zomthetho nezimvume ziyaphothulwa ngaphambi kokuqala kokwakhiwa.
Umthombo: UMnyango Wezokuxhumana Nokumaketha kaMasipala weTheku.
