Umzamo ohlangene woMnyango Wamaphoyisa eTheku iDurban Metro Police Service, iMunicipal Business Support, uMnyango Wezasekhaya kanye nezinye izinhlaka zikahulumeni uqhubeke nokuqinisa umkhankaso wokubhekana nabantu abangena ezweni ngokungemthetho kanye namabhizinisi angalandeli imithetho emkhankasweni omkhulu owenziwe enkabeni yeTheku ngoMsombuluko, mhla zingama-25 kuNhlaba 2026.
Lo mkhankaso obuhlanganise izinhlaka ezahlukene uholele ekuboshweni kwabokufika abangu-23 abangenazo izincwadi ezisemthethweni kanye nokuvalwa kwezitolo ezinhlanu ezingalandeli imithetho emigwaqweni emaphakathi nedolobha kuDr Pixley KaSeme Street kanye no-Anton Lembede Street.
Lokhu kuyingxenye yemizamo eqhubekayo yokuqinisa ukuthotshelwa kwemithetho yezokufika, ukuthuthukisa ukuphepha komphakathi kanye nokubuyisa uhlelo ezindaweni ezisemqoka zamabhizinisi nokuhweba eDolobheni.
Ehamba noKhansela weWadi 32 uProtas Mngonyama, ohole phambili umsebenzi wokuvuselela i-Albert Park eyake yaduma ngezidakamizwa nobugebengu, okhulumela amaphoyisa eMetro uColonel Boysie Zungu uthe:
“Sizwile futhi siyaphendula ezikhalazweni eziqhubekayo mayelana nokwanda kwezitolo ezingekho emthethweni, abantu abangekho ngokusemthethweni nabangenazo izincwadi, ukungcola, ubufebe kanye nokudayiswa kwezidakamizwa ezingekho emthethweni ngaphakathi nangaphandle kweDolobha.”
Bangu-32 abantu ababoshiwe ukuze kuqinisekiswe isimo sabo sokuhlala ezweni ngabakwaMnyango Wezasekhaya. Emva kokuhlolwa kwezincwadi zabo, kwabatholakala abangama-23 abaneminyaka ephakathi kwengama-21 nengama-54 ukuthi bahlala eNingizimu Afrika ngokungekho emthethweni, base beboshwa ngaphansi koMthetho Wezokufika.
Ababoshiwe bahlanganisa abantu abadabuka e-Ethiopia, eZimbabwe, eMalawi, eTanzania naseChina.
UZungu ukuqinisekisile ukuthi izitolo ezinhlanu zivaliwe ngenxa yokungalandeli imithetho nezidingo zomthetho ezibekiwe.
IDolobha lidlulise ukubonga kuzo zonke izinhlaka ezibambe iqhaza kulo mkhankaso, okubalwa kuzo abeSouth African Police Service, uMnyango Wezasekhaya, uMnyango Wezabasebenzi, uMnyango Wezempilo, amaphoyisa eMetro kanye nabanye ozakwabo bezokuphepha.
IDolobha lithe lizoqhubeka nemikhankaso ehlanganisa izinhlaka ezahlukene ngenhloso yokuqinisekisa ukuthotshelwa komthetho, ukugcina ukuthula nokuhleleka emphakathini kanye nokwakha indawo ephephile kubahlali, amabhizinisi kanye nezivakashi enkabeni yeTheku.
