IPoster ephromotha umdlalo wesibhakela ukuheha abalandeli nabathandi besibhakela
KZN NAMUHLA | EZEMIDLALO
UMnyango Wezemidlalo, Ubuciko Namasiko KwaZulu-Natal (KZN DSAC), ngokubambisana neMvelo Boxing Promotions, uzosingatha umqhudelwano omkhulu wesibhakela obizwa nge-RETURN TO GLORY 4 – FILL UP CITY HALL, ngoMgqibelo, mhla ziyisi-7 kuLwezi 2026, kusukela ngehora lokuqala emini (13h00), eCity Hall, eMgungundlovu (Pietermaritzburg).
Le nkampani yokugqugquzela isibhakela, eholwa nguNomvelo Magcaba-Shezi, isinesikhathi eside isebenzisana noMnyango ekuthuthukiseni lo mdlalo esifundazweni. Lokhu kubambisana kuyingxenye yemizamo yoMnyango yokweseka abagqugquzeli bemidlalo yesibhakela KwaZulu-Natal.
Lo mqhudelwano, ogunyazwe yinhlangano elawula isibhakela kuleli, iBoxing South Africa (BSA), uzoba nezimpi eziyisikhombisa, lapho kuzobe kubangwa khona amabhande obumpetha baseNingizimu Afrika nawaseKwaZulu-Natal.
Phakathi kwezimpi ezinkulu ezilindelekile kubalwa eyabesifazane yokubanga ibhande lobumpetha baseNingizimu Afrika esigabeni seJunior Middleweight, lapho uNobengazi Booth ezobhekana khona noNomandithini Ndyambo emzuliswaneni eyishumi.
Kuzophinde kube nempi yokubanga ibhande lobumpetha baseKwaZulu-Natal esigabeni seJunior Bantamweight phakathi kukaNtethelelo Magcaba noGcina Makhoba, nayo ezoba nemizuliswano eyishumi.
Enye impi elindelwe ngabomvu ngephakathi kukaNonkululeko Mncube noBabalwa Nonqonqotho, abazobhekana emzuliswaneni eyisishiyagalombili.
Ezinye izimpi ezizoba yingxenye yalo mqhudelwano zihlanganisa:
- UBongani Nhlangwini noSamkelo Ngwenya.
- UFundani “Tyson” Gumede noTrinity Mhlongo.
- UMenzi Hlongwa noSiyanda Mnyandu.
- UIan “Smurf” Stuart noAsanda Cele.
Lezi zimpi ezine zizoba nemizuliswano emine ngayinye.
UNgqongqoshe Wezemidlalo, Ubuciko Namasiko KwaZulu-Natal, uMnu Mntomuhle Khawula, uthe uMnyango uzibophezele ekutshaleni imali ekuthuthukisweni kwesibhakela ngokunciphisa izingqinamba zezimali ezibhekene nabagqugquzeli balo mdlalo, ngesikhathi uqinisekisa nokuvikeleka kwabasubathi.
UKhawula uthe lokhu kubambisana kuzoqhubeka nokukhula ukuze isibhakela siphinde sibe ngomunye wemidlalo eqhakazile esifundazweni.
“UMnyango usebenzisana eduze nabagqugquzeli besibhakela abaqeqeshiwe ukuze kuvuselelwe lo mdlalo KwaZulu-Natal. Sinxusa abalandeli besibhakela ukuba baweseke lo mqhudelwano kanye neminye ezosingathwa ezindaweni ezahlukene esifundazweni,” kusho uKhawula.
Lo mqhudelwano kulindeleke ukuthi unikeze abashayisibhakela ithuba lokuveza amakhono abo, bathuthukise imisebenzi yabo kwezemidlalo, kuphinde kukhuthazwe intsha enothando lwesibhakela ukuba ingene kulo mkhakha.
Amathikithi alo mqhudelwano aseyatholakala kwaComputicket.
Amalungu abezindaba nawo amenywe ukuba azohambela futhi abike ngalo mqhudelwano.
Ngemininingwane eyengeziwe noma ukuhlela izingxoxo nabezindaba:
- UNomvelo Magcaba-Shezi, Mvelo Boxing Promotions: 071 299 7062
- UMnu Mike Dube, BSA KZN Provincial Manager: 071 463 0749
Umthombo: UMnyango Wezemidlalo, Ubuciko Namasiko KwaZulu-Natal – Uphiko Lwezokuxhumana.
