IMeya yoMasipala weTheku, uKhansela Cyril Xaba, nePhini likaNgqongqoshe Wezamanzi Nokuthuthwa Kwendle, uDavid Mahlobo, bethule ngokusemthethweni imiklamo yokuthuthukiswa kwengqalasizinda nokuhlinzekwa kwamanzi ebiza u-R9 million eNgonyameni, eningizimu yeTheku, ngoLwesihlanu mhla zingama-23 kuOkthoba 2026.
SHEILA MHLONGO
Le miklamo ihlanganisa ibhuloho elisha elizokwenza kube lula ukungena nokuphuma endaweni, umgwaqo ongange khilomitha elilodwa owakhiwe ngokhonkolo, izinhlelo ezimbili zokuhlinzeka amanzi ngemigodi yamanzi angaphansi komhlaba ezindaweni zasemakhaya, kanye nezindlu ezingaphansi kohlelo lweVumengazi Rural Housing Project nohlelo lokulungiswa kwezindlu.
Umgwaqo nebhuloho kwakhiwe kabusha kulandela ukulimala kwengqalasizinda ngenxa yezikhukhula eziphindaphindayo kule ndawo.
Le miklamo iyingxenye yohlelo loMasipala weTheku lokusheshisa ukulethwa kwezidingongqangi emphakathini, ukubuyisa isithunzi sezakhamuzi, ukuthuthukisa izindawo zasemakhaya nokwenza ngcono izimpilo zabantu.
KUTSHALWE U-R8 MILLION EKWAKHIWENI KOMGWAQO NEBHULOHO
UMasipala weTheku utshale imali elinganiselwa ku-R8 million ekwakhiweni komgwaqo nebhuloho, ngenhloso yokwenza kube lula futhi kuphephe ukuhamba kwezakhamuzi.
Le ngqalasizinda kulindeleke ukuthi isize umphakathi ukufinyelela kalula ezithuthweni zomphakathi, ezikoleni, emitholampilo nakwezinye izikhungo zezempilo.
Umasipala uthe kukhethwe ukwakha umgwaqo ngokhonkolo ngenxa yokuthi uyakwazi ukumelana kangcono nezimo zezulu ezinzima, okubalwa kuzo izimvula ezinamandla nezikhukhula.
Lokhu kuhloswe ngakho ukuqinisekisa ukuthi ingqalasizinda ihlala isikhathi eside futhi ayilimali kalula uma kuba nezimo zezulu ezimbi.
UXABA UNXUSA UMPHAKATHI UKUBA UVIKELA INGQALASIZINDA
Ekhuluma ngesikhathi kunikezelwa le miklamo emphakathini, iMeya yeTheku, uKhansela Cyril Xaba, inxuse izakhamuzi ukuba ziyinakekele futhi ziyivikele ingqalasizinda entsha.
UXaba uxwayise ngokuthi ukucekelwa phansi kwempahla kahulumeni kubambezela intuthuko emphakathini futhi kudla izimali ebezingasetshenziswa ukuthuthukisa ezinye izindawo eziswele izidingongqangi.
“Ukucekelwa phansi kwempahla kamasipala kubuyisela imiphakathi yethu emuva futhi kudla izinsiza ebezingasetshenziswa ukuthuthukisa ezinye izindawo ezidinga usizo,” kusho uXaba.
Uphinde wagcizelela ukuthi umasipala uyaqhubeka nokuthatha izinyathelo zokubhekana nokushoda kwamanzi ezindaweni ezingakabi nawo amapayipi asemthethweni okuhambisa amanzi emakhaya.
KUTHULWE NOMKLAMO WAMANZI OBIZA U-R1 MILLION
Njengengxenye yemizamo yokulwa nokushoda kwamanzi, uXaba wethule ngokusemthethweni iTafelkop Borehole Project, okuwumklamo wokuhlinzeka umphakathi ngamanzi akhiwa ngemigodi embiwa ukuze kutholakale amanzi angaphansi komhlaba.
Lo mklamo ubiza imali elinganiselwa ku-R1 million futhi uyingxenye yohlelo olukhulu lokufakwa kwemigodi yamanzi engu-94 ezindaweni ezahlukene ezikhungethwe ukushoda kwamanzi ngaphansi kukaMasipala weTheku.
Umasipala uthi lolu hlelo luhloselwe ukusiza imiphakathi ngokushesha, ngesikhathi kusaqhubeka izinhlelo ezinkulu zesikhathi eside zokulungisa nokuthuthukisa ingqalasizinda yokuhlinzeka ngamanzi.
Lezi zinhlelo zesikhathi eside kulindeleke ukuthi zidle izigidigidi zamarandi njengoba umasipala uzama ukubhekana nezinselelo zokuhlinzekwa kwamanzi ezindaweni ezahlukene zeTheku.
UMAHLOBO UNCOME IMIZAMO YOMASIPALA WETHEKU
IPhini likaNgqongqoshe Wezamanzi Nokuthuthwa Kwendle, uDavid Mahlobo, lincome inqubekelaphambili eyenziwe nguMasipala weTheku ekuthuthukiseni ingqalasizinda yamanzi nasekutholeni ezinye izindlela zokuhlinzeka umphakathi ngamanzi.
“ITheku selihambe ibanga elide ekuthuthukiseni ingqalasizinda yamanzi nasekwandiseni ukuhlinzekwa kwamanzi, ngisho noma lokho kudinga ukuthi kubhekwe ezinye izindlela zokuhlinzeka ngawo,” kusho uMahlobo.
UMasipala weTheku uthe usazimisele ukuqhubeka nokusheshisa ukulethwa kwezidingongqangi ezifana namanzi, imigwaqo nokuthuthwa kwendle.
Uthe inhloso enkulu ukunciphisa igebe lentuthuko elikhona phakathi kwezindawo zasemadolobheni nezasemakhaya, ukuze zonke izakhamuzi zithole izinsizakalo ezisezingeni elifanele.
Umthombo: UMnyango Wezokumaketha Nokuxhumana kuMasipala weTheku.
