IMeya yoMasipala weTheku, uKhansela Cyril Xaba, ihola ithimba lezikhulu zikamasipala ngesikhathi kuhlolwa ingqalasizinda yokuhlinzekwa kwamanzi nokuthuthwa kwendle eMlazi, ngoLwesithathu mhla zingama-21 kuMfumfu 2026.Ukuhlolwa bekugxile ekulungisweni kwamapayipi amanzi avuzayo nasekuvulweni kwamapayipi endle abevalekile.-Izithombe: Thuli Dlamini.
SHEILA MHLONGO
IMeya yoMasipala weTheku, uKhansela Cyril Xaba, iyaqhubeka nokuqinisa imizamo yokunciphisa ukuvuza kwamanzi nokuchitheka kwendle, njengoba iphinde yavakashela eMlazi ngoLwesithathu, mhla zingama-21 kuOkthoba 2026, ukuyokwandisa uhlelo lokungenelela ekulethweni kwezidingongqangi ezigcemeni 83, 85, 86 no-87.
UXaba ubesendaweni ehola ithimba lezikhulu zikamasipala ezivela eminyangweni eyahlukene, ngenhloso yokuhlola isimo sengqalasizinda yokuhlinzekwa kwamanzi nokuthuthwa kwendle.
Ngesikhathi kuqhubeka ukuhlolwa, iMeya izwakalise ukwaneliseka ngokuthola amathimba kamasipala esebenza ezindaweni ezahlukene, elungisa amapayipi avuzayo futhi evula amapayipi endle abevaleke kakhulu.
UXABA UNCOME UKUSEBENZA KWAMATHIMBA KAMASIPALA
Ekhuluma ngesikhathi sokuhlolwa kwengqalasizinda, uXaba uthe kuyakhuthaza ukubona abasebenzi bakamasipala besebenza ngokushesha ukubhekana nezinkinga ezibikwe izakhamuzi.
“Amathimba ethu akhona ezindaweni ezahlukene, asebenza ukulungisa ukuvuza kwamanzi nokuchitheka kwendle okubikiwe. Sikhuthaza ukuphendula ngokushesha ezikhalazweni zomphakathi ngoba yilokho izakhamuzi zethu ezikudingayo. Uma siqhubeka ngalendlela, sizokwazi ukunciphisa nakakhulu ukuvuza kwamanzi,” kusho uXaba.
Uthe lolu hlelo lokungenelela luyingxenye yemizamo kaMasipala weTheku yokusheshisa ukulungiswa kwengqalasizinda ebalulekile yomphakathi.
Ngaphansi kwalolu hlelo, amathimba ezobuchwepheshe athunyelwa ezindaweni ezikhungethwe ukuvuza kwamanzi okuqhubekayo kanye nokuchitheka kwendle, ngenhloso yokuxazulula lezi zinkinga ngokushesha.
IZAKHAMUZI ZINXUSWA UKUBA ZIVIKELE INGQALASIZINDA
UXaba unxuse izakhamuzi ukuba zibambe iqhaza ekuvikeleni ingqalasizinda kamasipala ngokugwema ukulahla izinto ezingafanele emigodini yokuhlola nokulungisa amapayipi endle, eyaziwa ngokuthi ama-manholes.
Uthe ukusetshenziswa ngendlela engafanele kwengqalasizinda yomphakathi kungenye yezimbangela ezinkulu zokuphindaphindeka kokuvaleka kwamapayipi endle ezindaweni ezahlukene ezingaphansi kukaMasipala weTheku.
Lokhu kubangela ukuthi indle ichithekele emigwaqweni nasezindaweni okuhlala kuzo abantu, kuphazamise impilo yezakhamuzi kanye nenhlanzeko yemvelo.
IMeya igcizelele ukubaluleka kokusebenzisana phakathi komasipala nomphakathi ukuze kuvinjelwe ukulimala kwengqalasizinda nokuphindaphindeka kwezinkinga zokuchitheka kwendle.
KUNXUSWA UMPHAKATHI UKUBA UBIKE UKUXHUNYWA KWAMANZI NGOKUNGEKHO EMTHETHWENI
UXaba uphinde wakhuthaza izakhamuzi ukuba zibike ukuxhunywa kwamanzi ngokungemthetho, njengoba lokhu kufaka ingcindezi eyengeziwe engqalasizindeni ekhona yokuhlinzekwa kwamanzi nokuthuthwa kwendle.
Umasipala uthi ukuxhunywa kwamanzi ngokungemthetho kungaphazamisa ukusebenza kahle kohlelo lokuhlinzekwa kwamanzi futhi kwandise izinkinga ezikhona.
Izakhamuzi zingabika lezi zinkinga ngokusebenzisa lezi zindlela:
- Ucingo lwamahhala: 080 311 1111
- WhatsApp: 073 1483 477
- I-imeyili: Services@durban.gov.za
UKUVUZA KWAMANZI KWEHLE KUSUKA EZIGAMEKWENI EZINGU-13 000 KUYA KU-3 900
Emasontweni amabili ngaphambi kwalokhu kuvakasha, uXaba wayevakashele izigceme 80, 81 no-88 eMlazi, lapho amemezela khona ukuthi kube nokwehla okukhulu kwesibalo sezigameko zokuvuza kwamanzi ezibikiwe.
Ngokwesitatimende sikamasipala, isibalo sezigameko zokuvuza kwamanzi sehle sisuka ku-13 000 saya ku-3 900 kusukela kwaqala uhlelo lokungenelela ezinyangeni ezimbili ezedlule.
Lokhu kusho ukwehla kwezigameko ezibikiwe ngezingu-9 100, okulingana namaphesenti acishe abe ngu-70.
UMasipala weTheku uthi uzoqhubeka nokuthumela amathimba ezobuchwepheshe ezindaweni ezikhungethwe izinkinga zamanzi nokuthuthwa kwendle, ngenhloso yokusheshisa ukulungiswa kwengqalasizinda nokwenza ngcono ukuhlinzekwa kwezidingongqangi.
Umthombo: UMnyango Wezokumaketha Nokuxhumana kuMasipala weTheku.
