ZAMA MAJOLA
Top of Form
Uhulumeni ukuqinisekisile ukuzibophezela kwakhe ekuthuthukiseni umphakathi obandakanya abakhubazekile ngokusebenzisa ubudlelwano obuqinisiwe, ukufinyeleleka okuthuthukisiwe kwezinsizakalo, nokuvikela amalungelo nesithunzi sabantu abakhubazekile.
Ethula inkulumo yosuku emgubhweni kazwelonke woSuku Lomhlaba Lwabantu Abaphila Nokukhubazeka, eRustenburg, eNyakatho Ntshonalanga, uNgqongqoshe eHhovisi likaMengameli obhekele abesifazane, intsha kanye nabantu abakhubazekile, uSindisiwe Chikunga, uthe uhulumeni uqinisa ubudlelwano, wandisa ukutholakala kwezinsiza, futhi uqhubekisela phambili izinguquko ezibonakalayo ukuze kuvikelwe amalungelo abo bonke abantu abakhubazekile.
UChikunga ubalule ukuthi inqubekelaphambili akumele ikalwe ngezitatimende, kodwa ngokuthi abantu abakhubazekile bangafunda, basebenze, bahambe, bathole izinsiza, babambe iqhaza kwezemidlalo, futhi baphile ngokuphepha nangokuzimela emiphakathini yabo. Uvumile ukuthi abantu abaningi baseNingizimu Afrika abakhubazekile basabhekene nezithiyo ezingagwemeka okungafanele zibe khona.
Lokhu kuhlanganisa izakhiwo nezokuthutha ezingafinyeleleki, izinsizakalo ezingahlangabezani nezidingo ezahlukene, izimo zengqondo ezingabandakanyi, kanye nezomnotho ezingawavuli amathuba angempela. Ugcizelele ukuthi benza ngakho konke okusemandleni ukuqinisekisa ukuthi abantu abakhubazekile abacwaswa futhi bazizwa besekhaya.
