UMnyango Wezempilo uqale umkhankaso wokugoma i-Human Papilloma Virus (HPV) wango-2026.
Lo mkhankaso uhlose ukugoma amantombazane aneminyaka engu-9 nangaphezulu ukuze bawavikele ekutheni kamuva empilweni yabo angabi sengozini yokuthola umdlavuza wesibeletho.
“INingizimu Afrika ibonisa izinga eliphezulu lezibalo eziphezulu zabakhungethwe umdlavuza wesibeletho nokushona okuhlobene nawo minyaka yonke, naphezu kokuba imigomo esindisa impilo itholakala ezikhungweni zezempilo zikahulumeni nasemkhakheni wezempilo ozimele.
“Kunesibalo esingaphezu kuka- 5 700, wabakhungethwe umdlavuza wesibeletho abikwa minyaka yonke ezweni, kanti abesifazane abangaphezu kuka-3 000 bashona ngenxa yezinkinga ezihlobene nomdlavuza wesibeletho. Lokhu kusho ukuthi amantombazane angagonyiwe nabesifazane abaphila ne-HIV basengozini enkulu yokuba nezinkinga ezimbi zempilo uma bethola lo mdlavuza kamuva empilweni, uma kuqhathaniswa nomphakathi jikelele,” kusho umnyango.
UMnyango uqinisekisile ukuthi amaqembu aqeqeshiwe abasebenzi bezempilo azophatha lo mgomo.
“Lo mkhankaso wokugoma i-HPV osekelwe ezikoleni wenziwa ngokubambisana noMnyango wezeMfundo Eyisisekelo kanye nabanye ababambiqhaza okubalwa kubo iNhlangano Yezempilo Yomhlaba (WHO) kanye ne-United Nations International Children’s Emergency Fund (UNICEF).
“Umuthi wokugoma i-HPV uphephile futhi usebenza kakhulu uma unikezwa kusukela eminyakeni eyisishiyagalolunye noma ngaphambi kokuba amantombazane aqale ukwenza ucansi. ENingizimu Afrika, lo mgomo wagunyazwa yiSouth African Health Products Regulatory Authority ngo-2008 ngenxa yokusebenza kwawo nokuphepha kwawo. Izigidi zamantombazane eNingizimu Afrika sezawuthola umuthi wokugoma i-HPV ngaphandle kwemiphumela emibi emikhulu,” kuchaza umnyango.
Cishe amantombazane ayizigidi ezingu-3.6 – ikakhulukazi asezikoleni zikahulumeni – asezuze kulo mgomo, kanti imithamo engaphezu kwezigidi ezingu-7.2 isinikeziwe kusukela ngo-2014.
“Uhlelo selwandisiwe ukuze lufinyelele kuwo wonke amantombazane asezikoleni zikahulumeni nezizimele, kuhlanganise nezikole ezizimele ezikhethekile, ukuze kungabikho noyedwa oshiyekayo. Lo mkhankaso waminyaka yonke uzogxila kakhulu kumantombazane akwiBanga lesi-5 aneminyaka engu-9 nangaphezulu, ukuwavikela emdlavuzweni wesibeletho, osesele njengomdlavuza wesibili ovame kakhulu kubesifazane eNingizimu Afrika emva komdlavuza wamabele.
“Impumelelo yomkhankaso wokuvikela amantombazane kulesi sifo esigwemekayo kodwa esibulalayo incike ekubambisaneni okuqinile kwabo bonke ababambiqhaza, ikakhulukazi abazali nabanakekeli, abadingeka ukuthi bagcwalise amafomu emvume yokugoma akhishwa yizikole kubafundi besifazane abafanele,” kwengeza umnyango.
Abazali, abanakekeli kanye nababheki ngokomthetho bacelwa ukuba basayine amafomu emvume akhishwa yizikole ukuze amantombazane akwazi ukuthola lo mgomo. – SAnews.gov.za
