Seziqalile izingxoxo zokuqalisa izinhlelo zokubuyisela ukuxhumana kwezitimela emzileni osogwini oluseningizimu yeTheku kanye nokwakha ingqalasizinda emelana nokuguquguquka kwesimo sezulu. Ubuholi obuphezulu kuMasipala weTheku kanye ne-Passenger Rail Agency of South Africa (PRASA) babambe umhlangano osezingeni eliphezulu omayelana nokusheshisa ukwakhiwa kabusha kwebhuloho lesitimela lase-ILovo. Izingxoxo bezibanjwe ngoLwesithathu lomhlaka, 08 Ephreli 2026,
Lezingxoxo zibonisa ukubaluleka kokuvuselelwa komzila wesitimela obalulekile wezokuthutha obungasasebenzi kusukela ngesikhathi sezikhukhula ezimbi zika-Ephreli 2022 KwaZulu-Natal floods.
Iphrojekthi yebhuloho lase-Ilovo ibalulekile ukubuyisela ingqalasizinda kanye nokuvuselela umnotho esifundeni. Okuyingxenye ebalulekile yalolu hlelo ukubhidlizwa kwebhuloho lensimbi elineminyaka engu-100 ubudala, elalimiswe ngezigxobo (steel truss), elonakala kakhulu lapho uhlangothi lwalo olusenyakatho lubhidlika ngesikhathi sezikhukhula.
I-PRASA izokwakha ibhuloho elisha likakhonkolo elingamamitha angu-340, elakhiwe ngendlela ezomelana nezimo zezulu ezimbi kanye nezingozi zesimo sezulu zesikhathi esizayo.
Izinto Ezisemqoka Zomklamo Omusha Webhuloho:
- Ubude obunwetshiwe: Ubude bukhuliswa busuka kumamitha angu-230 buye kumamitha angu-340 ukuze bumboze ngokuphelele indawo ebhidlizwa izikhukhula.
- Ukuthuthukiswa kokugeleza kwamanzi: Umklamo ususa izinsika ezine zikakhonkolo ufake ezingu-13 ezibekwe ngobuchule ukuze kuncishiswe ukuvinjwa kokugeleza kwamanzi nokwehlisa ubungozi bezikhukhula esikhathini esizayo.
- Ukuvuselelwa komnotho: Ukubuyiselwa kwezinsiza zezitimela kuzosekela umnotho wendawo, kuthuthukise ukuhamba kwabantu futhi kwehlise izindleko zokuhamba kwabakhweli.
- Ukwakha kangcono: Ukushintsha kusuka esakhiweni sensimbi esibuthaka kuya kwibhuloho likakhonkolo eliqinile kuhambisana nesu leDolobha lokuthi Build Back Better, okuqinisa ukuthuthukiswa kwengqalasizinda esimeme nemelana nezinhlekelele.
Ekhuluma ngokubaluleka kobambiswano, uMqondisi Omkhulu eHhovisi loMphathi weDolobha kuMasipala waseThekwini, u-Sipho Cele, uthe:
“Ubambiswano phakathi kweDolobha ne-PRASA lubalulekile ekwakheni uhlelo lwezokuthutha lwesimanje, oluthembekile nolumelana nezimo. Asisabeli nje kuphela ezinhlekeleleni; sisebenza ngenhloso yokwakha ingqalasizinda engcono nekusasa elizinzile.”
UKUBONAKALISA INQUBEKELA PHAMBILI: ENDALA VS ENTSHA
Isakhiwo Esidala (Steel Truss):
Sakhiwa ngeminyaka yama-1920, ibhuloho lensimbi elinemitha engu-143 lase lifinyelele ekupheleni kwempilo yalo yokusebenza. Ngo-2022, ukuhlolwa kwakhombisa ukuthi alisakwazi ukuqinisekisa ukuphepha nokuzinza kwesikhathi eside ezizukulwaneni ezizayo.
Umklamo Omusha (Uqiniso Lwakhonkolo):
Ibhuloho elisha lizosebenzisa imishayo kakhonkolo eyakhiwe kusenesikhathi (precast M10), okuvumela isikhathi esifushane sokwakha, ukuqina okungcono kanye nokuzinza okukhulu kwesakhiwo ngaphakathi kwendawo yase-iLovu Estuary.
