ESITHOMBENI- isibuyiselwe isithunzi kulandela ukuphothulwa koHlelo Lwezindlu Zezisulu Zezinhlekelele nguMnyango wezokuBusa ngokuBambisana neziNdaba zoMdabu KwaZulu-Natal, i-KZN COGTA, KwaNongoma.
SHEILA MHLONGO
KwaNongoma, 21 Agasti 2026 – Imindeni eyishumi eyadilikelwa yimizi ngenxa yezinhlekelele ngo-Ephreli 2025 isibuyiselwe isithunzi kulandela ukuphothulwa koHlelo Lwezindlu Zezisulu Zezinhlekelele nguMnyango wezokuBusa ngokuBambisana neziNdaba zoMdabu KwaZulu-Natal, i-KZN COGTA, KwaNongoma.
Lokhu kulandela ukunikezelwa ngokusemthethweni kwezindlu ezinefenisha ephelele nguNgqongqoshe we-KZN COGTA, uMfundisi Thulasizwe Buthelezi, KwaNongoma ngoLwesihlanu.
Izimvula ezinamandla zaholela ekwakhekeni komgodi omkhulu emhlabathini, okwaphoqa imindeni ukuba ishiye amakhaya ayo ngo-Ephreli 2025 ngemuva kokuba izindlu zayo zibhidlike ngokuphelele. Lokhu kwaholela ekutheni uNgqongqoshe uButhelezi amemezele uHlelo Lwezindlu Zezisulu Zezinhlekelele, esebenzisana naMakhosi ukuthola omunye umhlaba okwakuzokwakhelwa kuwo amakhaya amasha emindeni ethintekile.
Injabulo nokubuyiselwa kwesithunzi kubonakale ngesikhathi uNgqongqoshe uButhelezi enikezela ngezindlu eziphelile, ezihlanganisa nezindlu eziyindilinga, emindenini yonke eyishumi.
Le mindeni kwadingeka ithuthelwe ezindaweni ezintsha ngemuva kokuba umhlaba eyayihlala kuwo utholakale ungakulungele ukwakhiwa nokuhlalwa ngenxa yomgodi owawusuvulekile.
Lesi bekuyisigaba sesibili sohlelo loMnyango lokunikezela ngezindlu ezakhelwe izisulu zezinhlekelele. Ngenyanga edlule, imindeni emine yanikezwa izindlu zayo eMbumbulu naseLokishini laseNanda, ngaphansi kukaMasipala weTheku.
UNgqongqoshe uButhelezi uthe lolu hlelo alugcini nje ngokubhekana nemiphumela yezinhlekelele, kodwa luphinde lubuyisele isithunzi kubantu. Uchaze ukuthi uMnyango wakhele umndeni ngamunye izakhiwo ezimbili, ezihlanganisa nendlu eyindilinga ehambisana nendlela yesintu yokwakha imizi yabantu base-Afrika.
“Ngesikhathi senza ukuhlola, sathola ukuthi kweminye imindeni amantombazane nabafana babelala ekamelweni elilodwa. Sanquma ukwengeza izindlu eziyindilinga ukuze abafana babe nendawo yabo. Kuyingxenye yesiko labantu base-Afrika futhi ukuba nemizi enezindlu eziyindilinga ezithathwa njengezindlu ezingcwele.
“Sibone kufanele ukuthi indlela esibhekana ngayo nezinhlekelele ihambisane nendlela abantu bakithi abaphila ngayo. NjengoMnyango, sesithathe isinqumo sokuqhubeka nale ndlela yokwakha nakwezinye izindawo lapho sizokwakhela khona imindeni izindlu,” kusho uNgqongqoshe uButhelezi.
