OWAMI THABETHE
ISilo samaZulu uMisuzulu kaZwelithini ubeke inselelo esizweni saso ukuthi sigcine amasiko aso. ISilo besikhuluma emcimbini wokugubha uMkhosi WeLembe KwaDukuza eStanger ogwini olusenyakatho yeKwaZulu-Natali.
KwaDukuza yilapho kwabulawa khona iNkosi uShaka Zulu ngo-1828. Lomcimbi ubanjwa minyaka yonke ukuhlonipha ifa likaShaka. Amabutho, izintombi kanye nezakhamuzi zendawo ziphume ngobuningi bazo ukuzobungaza.
Abebekhona bebegqoke imvunulo yesintu bephethe nezikhali zesintu okubalwa imikhonto, amahawu nezinduku. Lezi yizimpawu zamandla esizweni samaZulu njengoba zasetshenziswa ukunqoba umbuso wamaNgisi ngowe-1879.
Enkulumeni yaso iSilo sizwakalise ukukhathazeka ngokuthi umlando weSilo uShaka uhlanekezelwe ngakho kumele ulungiswe.
“Inkosi uShaka yasukuma yakha isizwe samaZulu. Wenza isiqiniseko sokuthi isizwe siyakhula futhi sibusa ezinye izizwe. Kodwa umbuzo uthi senzani njengesizwe samaZulu? Siyahlonishwa, amaZulu athandwa kakhulu uma kuqhathaniswa nezinye izizwe kodwa senzani ngalokho? Niyithemba le-Afrika njengoba sinomhlaba wethu, amasiko nolimi lwethu kodwa kungani singathuthuki?”
ISilo siphinde sagubha usuku lwaso lokuzalwa emkhosini, imbube ibihlanganisa iminyaka engu-50 idla anhlavana.
Inyosi yeSilo uBuzetsheni Mdletshe kanye nomholi weqembu Amabutho Makhaladi Nhleko banxuse intsha ukuthi ibambe iqhaza emicimbini yesintu ukuze ifundiswe ngamasiko .
Ibamba likaNdunankulu waKwaZulu-Natali ophinde abe nguNgqongqoshe wezoLimo nokuThuthukiswa kwezindawo zaseMakhaya, uThembeni Madlopha-Mthethwa, usenxuse abaholi bomdabu ukuthi babuyisele isimilo kanye nomoya omuhle esizweni samaZulu.
“Siyaziqhenya njengesizwe samaZulu ngento eyenziwe yiSilo uShaka futhi sibonile ukuthi ubumbano luyasebenza futhi lukhombisa amandla. Thina njenge-GNU sikholelwa ukuthi ubumbano nokusebenzisana kuwumyalezo esiwuthole eNkosini uShaka.”
