UMengameli waMaZulu, uMnu. uSandile Zungu, usememezele izinguquko endimeni yokuqeqesha eqenjini loSuthu njengoba isekela lomqeqeshi u-Ayanda Dlamini liqokelwe kwesokuba umqeqeshi wesikhashana, kwathi uRomain Folz okade engu mqeqeshi weqembu wangena esikhundleni sokuba ngu-technical director kanti uphinde eluleke umengameli mayelana nezinhlelo zohlelo lwe- AmaZulu’s Vision 2032.
UMengameli uchaze ukuthi izinguquko ziqala ngesikhathi enza isimemezelo ukusebenza kuze kube sekupheleni kwesizini.
Esitatimendeni seqembu ebesifakwe kwi-website yoSuthu umengemali ubekubeke kwacaca ukuthi umdlalo kumele uhambisane nemiphumela kanti iqembu belisele nemidlalo eyisithupha kuphela yize belisendaweni yesi-12 nokuyinto ongeke uyilindele eqembini elifana naMaZulu FC.
“Isinqumo esisithathile ngesokuthi siqoke u-Ayanda Dlamini njengomqeqeshi obambile kuze kuphele isizini. Umsebenzi wakhe wukulwela amaphuzu angu-18 asele esisangawathola”
UDlamini ungene kulesikhundla enomsebenzi omkhulu wokulungiselela iqembu njengoba kade lizobhekana neCape Town City ngempelasonto edlule.
“UFolz, ziningi izinto esifuna ukuqhubeka nazo naye njengeqembu. Ngimgcine njenge techinical director, ukuze eluleke umengameli mayelana nezinhlelo zohlelo lwe- AmaZulu’s Vision 2032 kuze kuba kuphela isizini” kusho uMengameli weqembu.
“Kuzolindeleka ukuthi angaphazamisi ukusebenza kwansuku zonke kweqembu. Siyambonga ngegalelo lakhe eqenjini,” kuphetha uZungu.
