SHEILA MHLONGO
ISilo samaZulu uMisuzulu kaZwelithini sinxuse ukuthi umthetho kumele udlale indawo yawo, uphuthume wenze ubulungiswa mayelana namacala okubulawa kwamaKhosi neziNduna. ISilo sikusho lokhu ngesikhathi kunomkhuleko obubanjelwe kwaCeza emanxiweni eNkosi uDinuzulu lapho yalwela khona izimpi zayo. Umkhuleko ubungempelasonto esiphuma kuyo.
Sethula inkulumo yaso iSilo, phambi kwezinkumbi zabantu ebezethamele umkhuleko okubalwa, amabutho, iziNduna, amaKhosi kanye namakholwa amahlelo ehlukene sithe, kumele kususwe lezibhamu ezigcwele esifundazweni saKwaZulu-Natali ikakhulukazi emahostela ngoba ziyabaqeda abantu.
Siqhuba iSilo, sithe, kuzomele kube nobumbano esizweni sonkana kanye nasemabandleni. Sikhale ngezinga eliphezulu lenkohlakalo ezikhungweni zikahulumeni sathi lesi isihlava esibi esephuca abantu ilungelo lokuthola izidingo zabo.
Mayelana nodaba lwe Ingonyama Trust iSilo sizwakalise ukuzibophezela kwaso, sathi angeke silokothe senzele phansi umbuso kanye nesizwe ngokuthi siyekelele phansi umsebenzi esiwuphathiswe uMdali.
ISilo sigcizelele ngokuthi sona siphathiswe umsebenzi wokugcinwa komhlaba njengoba nobaba waso Inkosi uZwelithini kaBhekuzulu wenza. Sabe sesinxusa amabandla ukuthi akhulekele uNdunankulu kaZulu Inkosi uMangosuthu Buthelezi ngoba busadingeka kakhulu ubuholi bakhe uShenge.
ISilo siphinde saveza iphupho laso lokwakha Isigodlo, isonto, kanye nendawo ezodonsa abavakashi kwaCeza lapho kwake kwahlala khona Inkosi uDinuzulu.
“Ngokuzayo siyoqinisekisa ukuthi umkhuleko uhlanganise nezinye izizwe kungabikho abasala ngaphandle njengoba kukhona abangibuzile ukuthi kungani bengamenywanga kulo mkhuleko”. Kuphetha iSilo
UNgqongqoshe wezeMidlalo, ezobuCiko, kanye namaSiko uDktl. Ntuthuko Mahlaba, naye ubekhona kulomkhuleko wabe esethembisa ukuthi uzokwenza konke okusemandleni ukuthi avuselele izakhiwo zakwaCeza lapho kwakuhlala khona Inkosi uDinuzulu, nokulapho yake yenza khona umkhuleko ngesikhathi ibhekene nobunzima embusweni wayo.
.
