OWAMI THABETHE
Ilindelwe ngabomvu inxanxathela yezitolo entsha ezoba yingqophamlando iPrince Buthelezi Mall eMpangeni, KwaZulu-Natali, okuwutshalomali lwakamuva olwenziwe ngumthuthukisi ohamba phambili iMoolman Group enabanikazi abambisene nabo iTwin City kanye neMelta Capital, isiqalile ngokusemthethweni ukwakha okulethela lomphakathi intuthuko ezokwakha amathuba omsebenzi.
Inxanxathela yezitolo iPrince Buthelezi phambilini ibiyaziwa ngeGreenhills Mall; nokho abathuthukisi nabatshalizimali baqambe kabusha lesi sakhiwo ngesibalo esiphawulekayo emlandweni wethu, okubonisa ukuzinikela okujulile emphakathini namagugu awo.
Le nxanxathela yezitolo ihlelelwe ukuthi iqedwe ezinyangeni eziyi-18 ezizayo futhi iguqule isimo sokudayisa eMpangeni. Izokwethula indawo yokuqala yokuthenga elula nekhangayo enothe ngezinsiza zokudayisa, ezinhlobonhlobo kanye nolwazi ngaphansi kophahla olulodwa lapho ivula iminyango yayo ngo-Ephreli 2026.
Abatshalizimali bathe kwacatshangwa kakhulu ngokuklama iPrince Buthelezi Mall ukuze ibhekelele abathengi bayo bakusasa. Inxanxathela yezitolo entsha izoba nerenki entsha enkulu yamatekisi, indawo yokupaka yamahhala eyanele, idizayini yesimanjemanje kanye nezindawo zokuhlala zomphakathi, kanye nokuthenga okuphephile futhi okunomoya opholile.
I-Prince Buthelezi Mall isivele ithole ingqwaba yabathengisi njengabaqashi, abakwaCheckers FreshX, Shoprite, Woolworths, Boxer, Dis-Chem noClicks bazoqinisa inxanxathela yezitolo. Izitolo ezihamba phambili zizongena okokuqala edolobheni laseMpangeni ePrince Buthelezi Mall, okubalwa kuzo iCrazy Plastic, Crazy Pets, Converse, Roots nePolo.
Kuzophinde kube nezinhlobonhlobo yezitolo zemfashini kanye nezitolo zokungcebeleka.
Ukuthola iphrojekthi yalesi sikali kanye nokubaluleka esikhathini sokuqala kwakungeyona into elula njengoba kwakudinga ukuhlela ngokucophelela nokusebenzisana nababambe iqhaza abaningi. Ngenhlanhla, abanikazi benxanxathela yezitolo bonke banawo amarekhodi afakazela ukwazi ukwakha izinhlelo eziyimpumelelo zokuthuthukiswa kwezakhiwo, kanti lo msebenzi uthole ukwesekwa okukhulu kuMasipala Wendawo waseMhlathuze ekutholeni i-Prince Buthelezi Mall kuze kube manje.
