SHEILA MHLONGO
INingizimu Afrika ithi iyasiqaphela isinqumo se-United States sokuhoxisa uhlelo lwe-US International Climate Finance Plan, olwaholela ekuhoxisweni kobudlelwano be-Just Energy Transition (JET) neNingizimu Afrika.
Ngenyanga edlule, uMengameli wase-US, uDonald Trump, wasayina i-Executive Order 14162 ukuze asule futhi ahoxise lolu hlelo.
Ngokwemibiko, lokhu kusho nokuhoxa ngokushesha kwe-United States esivumelwaneni saseParis esenzelwe ukulwa nokushintsha kwesimo sezulu ngokunciphisa ukukhishwa kwegesi eyingozi emhlabeni.
UMnyango Wezobudlelwano Namazwe Ngaphandle Nokubambisana (DIRCO) uthe izenzo zakamuva zikaMongameli Trump zithinte izinqubomgomo ezihlose ukuqhubekisela phambili uhlelo lweNingizimu Afrika lwe-Just Energy Transition Investment Plan (JETP).
“Ngenxa yalokhu, kusukela manje, i-US imemezele ukuphela kobulungu bayo kwi-International Partners Group (IPG) ye-JETPs eNingizimu Afrika, e-Indonesia naseVietnam,” kuchaza umnyango.
Ngokuhoxa kwe-United States, umnyango uthe nezithembiso zezezimali ezihlobene nazo sezihoxisiwe.
“Amaphrojekthi ayexhaswe ngemali futhi abesezigabeni zokuhlelwa noma zokusebenza asekhanseliwe.”
Kodwa-ke, i-DIRCO ithe izwe lihlala lizinikele ekuqaliseni izivumelwano zamazwe omhlaba, kuhlanganisa nezinqumo ezathathwa esivumelwaneni somlando saseParis.
“I-Ningizimu Afrika nabanye ozakwethu bamazwe omhlaba bazohlola imiphumela yokuhoxa kwe-US ku-JETP,” kusho umnyango.
Ngesikhathi kuxoxwa ephalamende mayelana nesinqumo se-United States sokunciphisa uxhaso oluvela kwi-United States Agency for International Development (USAID), uNgqongqoshe we-DIRCO, uRonald Lamola, uthe iNingizimu Afrika akufanele ilile ngalolu shintsho. Esikhundleni salokho, izwe kufanele libone le mehluko njengethuba lokuguquka.
“Kumele sisebenze ndawonye ukunciphisa umthelela ongemuhle wokuncishiswa kwezimali ze-USAID. Kumele sisebenzise leli thuba ukuze sicabange kabusha uhlelo lwethu lomhlaba jikelele futhi siqinisekise ukuthi izidingo zethu zasekhaya zisebenza kahle futhi ziqhubekela phambili ngokusimama,” kusho uLamola etshela Amalungu ePhalamende (MP).
Uveze ukuthi i-United States iyona ozakwethu omkhulu wezohwebo eNingizimu Afrika emhlabeni, ngemuva kwe-China.
INingizimu Afrika inezinkampani zaseMelika eziyi-601, ezibandakanya imisebenzi engama-143 000.
UNgqongqoshe utshele amaMP ukuthi ngo-2023, ukuhwebelana phakathi kwe-US neNingizimu Afrika kwafinyelela ku-US$ 22 billion, kanti i-United States iyindawo enkulu yokuthekelisa imikhiqizo yezolimo yaseNingizimu Afrika.
INingizimu Afrika ithumela e-United States igolide, izimoto, iziqalisi zamakhemikhali, ama-ferroalloys, amawolintshi, ubucwebe, amantongomane, amakhemikhali, amawayini, izinjini, ama-turbine, kanye nemikhumbi nezikebhe.
Ngokwephawula kukaLamola, izinkampani zaseNingizimu Afrika ezingu-22 njengamanje zitshale imali e-United States, zinikeza imisebenzi engaba ngu-6 900.– SAnews.gov.za.
