SHEILA MHLONGO
Umphakathi uyalulekwa ukuthi usebenzise ama-Smartphone awo ukuqinisekisa ubuqiniso bazisebenzi eziqhuba ucwaningo lwe-Statistics South Africa (Stats SA).
Unyaka wonke, i-Stats SA iqhuba izinhlobo ezahlukene zocwaningo okuhlanganisa: i-Quarterly Labour Force Survey (QLFS), i-General Household Survey (GHS), i-Governance, Public Safety and Justice Survey (GPSJS), i-Domestic Tourism Survey kanye ne-Consumer Price Index.
I-Stats SA ixwayise umphakathi ngezinsolo ezingamanga zokuthi kukhona ukuvakashelwa kwezindlu ngomnyango nomnyango ukuze kuqoqwe imininingwane yokuzazisa (ID verification) ezisabalala ezinkundleni zokuxhumana.
“I-Stats SA ifisa ukucacisa ngokusobala ukuthi ayihambeli emakhaya ngendlela yokungena umnyango nomnyango ngenhloso yokuqoqwa kwemininingwane ye-biometrics, ukuqinisekiswa kwe-ID noma ukuskenwa kwezigxivizo zeminwe kunoma yiluphi ucwaningo lwayo – kuhlanganise nezibalo zabantu (census). Umphakathi ucelwa ukuba uqaphele kakhulu. Abantu abazenza abamele i-Stats SA futhi abafuna ukungena emakhaya ngenhloso ye-biometrics noma ukuqinisekiswa kwe-ID abasebenzi egameni lenhlangano,” kusho i-Stats SA.
Indlela yokuhlonza abenzi bomsebenzi bangempela bakwa-Stats SA:
- Bonke abenzi bomsebenzi bathwala amakhadi e-ID asemthethweni anezithombe kanye nezincwadi zokwethula ezisayiniwe.
- Bagqoka izingubo ezinophawu lwe-Stats SA, okuhlanganisa ama-t-shirt, ama-bib namakepisi.
- Basebenzisa izimoto ezisemthethweni ezinezimpawu ze-Stats SA.
- Umphakathi ukhuthazwa ukuthi uqinisekise ubuqiniso bezisebenzi usebenzisa ithuluzi lokuqinisekisa elitholakala kuwebhusayithi ye-Stats SA ethi www.statssa.gov.za, noma ngokuxhumana ne-Call Centre ku-0800 110 248.
Noma yimuphi umsebenzi osolisayo kufanele abikwe esiteshini samaphoyisa esiseduze futhi waziswe i-Stats SA ngezinkundla zayo zokuxhumana noma nge-Call Centre.
— SAnews.gov.za
