INkosi uNsikayezwe Zondi yesizwe sakwaMpumuza ngokuhlanganisa iminyaka engama-50 ihlezi esihlalweni sobukhosi.
UNgqongqoshe woMnyango Wezokubusa Ngokubambisana Nezindaba Zomdabu KwaZulu-Natal (COGTA), uMfundisi Thulasizwe Buthelezi, uncome iNkosi uNsikayezwe Zondi yesizwe sakwaMpumuza ngokuhlanganisa iminyaka engama-50 ihlezi esihlalweni sobukhosi.
KwaMpumuza, UNgqongqoshe woMnyango Wezokubusa Ngokubambisana Nezindaba Zomdabu KwaZulu-Natal (COGTA), uMfundisi Thulasizwe Buthelezi, uncome iNkosi uNsikayezwe Zondi yesizwe sakwaMpumuza ngokuhlanganisa iminyaka engama-50 ihlezi esihlalweni sobukhosi.
Lo mcimbi obubungaza iminyaka engu-50 iNkosi Zondi yabekwa esihlalweni sobukhosi, ububanjelwe KwaMpumuza, eMgungundlovu, ngoMgqibelo womhlaka 31 Okthoba. Izinkumbi zamalungu omphakathi bezibuthene ngenjabulo ukuzobungaza leli qophelo elibalulekile emlandweni wobuholi beNkosi Zondi.
INkosi Zondi yaqala ukubusa mhla zingama-31Okthoba 1976.
Amalungu omphakathi ancome iqhaza elikhulu elibanjwe yiNkosi ekuletheni intuthuko, ukuthula nokuzinza endaweni yaseVulindlela, engaphansi kukaMasipala waseMsunduzi.
Lo mcimbi ubuhanjelwe abaholi bezepolitiki, izinhlangano zomphakathi, amakhosi, amabutho, izintombi zomhlanga kanye nomphakathi wonkana.
Izikhulumi ezahlukene zincome ubuholi obuqotho beNkosi Zondi, ikakhulukazi indima eyayidlala ekukhuthazeni ukuthula ngesikhathi sodlame lwezepolitiki olwalukhungethe indawo yaseVulindlela ngaphambi kokufika kwentando yeningi eNingizimu Afrika.
UNgqongqoshe Buthelezi uthe iNkosi Zondi ibe yisibonelo esihle sobuholi obunesimilo, obubeka phambili ukuthula, ukubumbana komphakathi kanye nentuthuko.
Uyincomile iNkosi ngokuba yizwi elikhuthaza ukuxoxisana nokubuyisana phakathi kwezikhathi ezinzima, lapho udlame lwezepolitiki lwaludlangile endaweni yaseVulindlela.
Uphinde wayishayela ihlombe ngokusebenzisana nabaholi bamaqembu ezepolitiki ahlukahlukene ngenhloso yokuletha ukuthula nokukhuthaza intuthuko emphakathini.
Ukugujwa kwale minyaka engama-50 yobukhosi beNkosi Zondi kube yithuba lokubonga nokuhlonipha igalelo layo ekwakheni umphakathi onokuthula, ubumbano kanye nentuthuko.
Umthombo: UMnyango Wezokubusa Ngokubambisana Nezindaba Zomdabu KwaZulu-Natal (KZN COGTA).
