UMphathi we KUMISA uMnu Thando Nyameni ekanye no Sphamandla Nene oyi Project Manager
SHEILA MHLONGO
I-KwaZulu-Natal United Music Industry Association (KUMISA) yethule ngokusemthethweni i-EP yayo yokuqala edidiyelwe izimenenja zamaCiko, ethi Sounds of the Streets emcimbini we-5th Annual KUMISA Music Brunch obungoLwesine, 26 Febhuwari 2026 eHollywoodbets Greyville Racecourse, eSadlers Arms Restaurant, eThekwini.
Le EP igxile ezindabeni zasemalokishini, isigqi saseNingizimu Afrika kanye nezindaba ezithinta impilo yangempela. Ihlanganisa izinhlobo zomculo ezifana neHip-Hop, Afro-Soul, R&B ne-3-step, ibhekana nezinkinga zomphakathi ezinjengodlame olubhekiswe kwabesifazane, kanye nezindikimba zothando, ukubekezela, ukuqina nethemba.
Umcimbi ube nengxoxo yabaholi bomkhakha womculo, kubalwa uMbuso Khoza, uMaqhinga Radebe, uZanda Mthembu waseUkhozi FM, kanye nomphathi wohlelo uLerato Matsoso waseCAPASSO. Indikimba yalo nyaka ithi: “AI Meets Ancestral Sound: Preserving Indigenous Music in the Digital Age,” egxile ekusetshenzisweni kobuhlakani bokwenziwa (AI) emculweni wesintu.
Le EP yakhiwe njengengxenye ye-2025/2026 KUMISA Music Publishing and Artist Management Masterclass, ehlose ukuhlomisa abaculi abasafufusa ngamakhono okushicilela, ukuphathwa kwamalungelo kanye nokuthuthukiswa komsebenzi wabo. I-KUMISA iqhubeka nokukhuthaza ukuvikelwa nokuthuthukiswa komculo wesintu esikhathini sedijithali.
