I-DStv isimemezele ushintsho olukhulu endleleni ehlela ngayo izinhlelo zayo zokubuka eNingizimu Afrika, okuhambisana nokwethulwa kwelogo entsha yenkampani ngaphansi kobunikazi beCanal+.
Lezi zinguquko zethulwe esithangamini nabezindaba ebesibanjelwe eMultiChoice City eRandburg ngoMsombuluko. Izinhlelo ezintsha ezinhlanu zizoqala ukusebenza ngomhlaka-17 Septhemba, zithathe indawo yendlela yakudala yokuhlela amaphakheji.
I-Starter izobiza u-R99 futhi ibe neziteshi ezingu-85, i-Select ibe ngu-R299 neziteshi ezingu-100, kanti i-Sports izobiza u-R399 ibe neziteshi ezingu-115. I-Movies & Series izoba ngu-R500, nayo ibe neziteshi ezingu-115, kanti i-Premium izobiza u-R799 neziteshi ezingu-130.
I-Sports izofaka iPremier League, UEFA, PSL, ikhilikithi, umbhoxo wakuleli, umdlalo owodwa we-URC ngesonto kanye ne-UFC. IFomula 1, igalofu, i-ATP tennis neminye imidlalo esezingeni eliphezulu izosala kwi-Premium.
I-Movies & Series izoletha i-M-Net kubabukeli abangekho kwi-Premium okokuqala, kanye ne-kykNET, iziteshi zamafilimu, iDiscovery neBBC Earth.
I-DStv iphinde yethule amagama amasha eziteshi afana ne-Wethu+, SuperSport Kickoff, SuperSport Football Plus, M-Net Movies+, Stars and Legends.
Source:SABC News
