IPhini leDini ophikweni lwezeSayensi yezokwelapha e-UKZN, uSolwazi Andile Khathi, uhlabane nge-National University Teaching Award.
USolwazi Andile Khathi, oyiPhini le-Deani ophikweni lwezeSayensi yezokwelapha eSikoleni Sezokwelapha eNyuvesi yaKwaZulu-Natal (UKZN), uqokwe njengomunye wabantu abayisithupha abahlabane ngezindondo ze-National University Teaching Awards (NUTA) zango-2026.
UKhathi uzohlonishwa ngokusemthethweni emcimbini omkhulu wokuklomelisa we-NUTA ozoba mhla zingama-20 kuNovemba 2026 eGoli.
Njengomcwaningi owaziwa umhlaba wonke ocwaningweni lwe-prediabetes nanjengothisha oseke wahlabana ngezindondo, uKhathi uzakhele igama elihle emkhakheni wezemfundo ngokuhlanganisa ukufundisa, ucwaningo, ukusungula izinto ezintsha kanye nokweluleka abafundi abenza iziqu eziphakeme.
Ukuhlonishwa kwakhe yi-NUTA kwenezela emlandweni wakhe wokwenza kahle. Ngo-2025, wathola i-UKZN Distinguished Teacher’s Award ngenxa yokwenza kahle kwezemfundo kanye negalelo lakhe eliguqulayo emfundweni ephakeme. Ngawo lowo nyaka, waphinde wathola i-Vice-Chancellor’s Research Award, eyayiqhakambisa ukuqhubeka kwakhe nokwenza kahle ocwaningweni nokuzinikela ekuqondiseni abafundi abenza iziqu eziphakeme.
Impumelelo yakhe isihlonishwe nasezingeni likazwelonke. Phakathi kwezindondo azitholile kubalwa i-South African Medical Research Council Bronze Award yango-2025, ngenxa yomsebenzi wakhe onomthelela omkhulu novula izindlela ezintsha, kanye ne-National Research Foundation Research Excellence Award for Emerging Researchers in the Natural Sciences ayithola ngo-2022.
UKhathi uphinde waba negalelo elikhulu ekuthuthukisweni kolwazi nasemkhakheni wezemfundo. Usebhale imibhalo yocwaningo engaphezu kwe-145 ebuyekezwe ngochwepheshe, kanye nesahluko sencwadi. Uphinde waqondisa futhi weluleka ngempumelelo abafundi abayi-12 abathole iziqu zobudokotela i-PhD, abangama-49 abathole iziqu ze-master’s kanye nabangama-61 abathole iziqu ze-honours.
UDkt Normah Zondo, onguMqondisi Omkhulu woPhiko Lwezobudlelwano Benhlangano e-UKZN, uhalalisele uKhathi ngalokhu kuhlonishwa okumangalisayo. Uthe impumelelo yakhe ayikhombisi kuphela ukukhiqiza kwakhe imiphumela emihle ocwaningweni, kodwa iphinde iveze ukuzinikela kwakhe okuqhubekayo ekuthuthukiseni isizukulwane esilandelayo sabacwaningi nezingcweti emikhakheni eyahlukene.
UZondo uthe: “Ukuhlonishwa kwakhe ezingeni likazwelonke kuwubufakazi obunamandla bezinga eliphezulu kanye nomthelela wokufundisa nokufunda e-UKZN. Kuphinde kuqinise ukuzibophezela kwethu kwesu lokwakha isiko lezemfundo lapho ukwenza kahle ekufundiseni, ocwaningweni, ekusunguleni izinto ezintsha nasekuphumeleleni kwabafundi kusebenzisana futhi kuqinisana khona.
“Njengoba i-UKZN iqhubeka nokuqinisa isikhundla sayo njengesikhungo esihamba phambili semfundo ephakeme, impumelelo efana nalena isikhumbuza ngethalente elimangalisayo elikhona emphakathini wethu wezemfundo, kanye negalelo elikhulu elenziwa yizifundiswa zethu ekuthuthukiseni imfundo ephakeme eNingizimu Afrika nangale kwemingcele.
“Sithemba ukuthi impumelelo kaKhathi izogqugquzela ozakwabo nabafundi kuyo yonke iNyuvesi ukuba baqhubeke nokuphishekela ukwenza kahle, bamukele ukusungulwa kwezindlela ezintsha futhi benze umehluko obonakalayo ngomsebenzi wabo.”
Top of Form
Bottom of Form
