IMeya kaMasipala waseThekwini, uKhansela Cyril Xaba, ivule ngokusemthethweni i-Eleventh Avenue Interchange entsha eClermont, ebize u-R312 million
SHEILA MHLONGO
IMeya kaMasipala waseThekwini, uKhansela Cyril Xaba, ivule ngokusemthethweni i-Eleventh Avenue Interchange entsha eClermont, ebize u-R312 million.
Lokhu kuyingxenye ebalulekile yohlelo lwezokuthutha umphakathi i-GO! Durban Integrated Rapid Public Transport Network, okulindeleke ukuthi luqale ukusebenza ngoDisemba.
Le ngqalasizinda entsha, eseduze noDumisani Makhaye Highway, iyingxenye ye-C3 Corridor ehlanganisa iBridge City nePinetown. Inhloso yayo ukunciphisa isiminyaminya sezimoto nokwenza kube lula futhi kusheshe ukuhamba phakathi kwalezi zindawo.
I-Eleventh Avenue Interchange, eyaqedwa ngoJuni nonyaka, iphinde ixhumanise imiphakathi yaseBerkshire Downs, eClermont naseKwaDabeka.
UMasipala uthi ukutshalwa kwale mali enkulu emigwaqweni kuhloswe ngakho ukwenza izimoto zihambe kangcono, kuthuthukiswe ukuphepha emigwaqweni futhi kube lula ukuthi abashayeli bezimoto nabahamba ngezinyawo basebenzise le ndawo.
Ngemuva kokuvulwa kwale ngqalasizinda, uXaba unikezele ngezindlu emindenini eku-Ward 22.
Ube eseqhubeka nokuyohlola umsebenzi oqhubekayo e-Kloof Extensions 15 and 21 Housing Project, ngaphambi kokuhlangana nezakhamuzi emhlanganweni womphakathi obuseSugar Ray Xulu Stadium.
Ekhuluma nezakhamuzi, uXaba uthe uMasipala uhlela ukukhulisa utshalomali engxenyeni esentshonalanga yeTheku ukuze kwakheke amathuba emisebenzi emiphakathini yakule ndawo.
Uthe iTheku lizoqhubeka nokuheha abatshalizimali ngoba ukukhula komnotho kungasiza imindeni ukuthi ikwazi ukuziphilisa.
UXaba uphinde wagcizelela ukuthi ukuhlinzeka izakhamuzi ngezindlu ezifanele kusalokhu kuyinto ehamba phambili kuMasipala, ngenhloso yokubuyisa isithunzi sabantu.
Umthombo: eThekwini Municipality
