Le misebenzi yokulungisa nokuthuthukisa ingqalasizinda isize ekuqiniseni amazinga okuphepha, yaphinde yaqinisekisa ukuthi inkundla ihlala isesimweni esifanele sokusingatha imicimbi emikhulu yezemidlalo neminye imicimbi eheha izivakashi.
SHEILAMHLONGO
Njengengxenye yomkhankaso kaMasipala weTheku wokubungaza impumelelo yeminyaka emihlanu yokulethwa kwezidingo emphakathini (2021–2026), ngaphansi kwesiqubulo esithi “Asimile Siyaqhuba – Sinqoba Izinselelo Ngokuqina Nangokubekezela,” kuleli sonto kugxilwe ezinkundleni zezemidlalo zeDolobha kanye neqhaza lazo ekuthuthukiseni ezokuvakasha, ukukhulisa umnotho nokudala amathuba emisebenzi.
Ngophiko olubhekele ukuphathwa kwezinkundla zezemidlalo ezisetshenziselwa imicimbi yezohwebo (Commercial Sports Facilities Directorate), izinkundla ezisezingeni eliphezulu njengeMoses Mabhida Stadium ziheha imicimbi emikhulu yezemidlalo, amakhonsathi omculo, imibukiso kanye nemicimbi yezinkampani.
Le micimbi idala amathuba amabhizinisi endawo, iphinde ifake isandla ekukhuliseni umnotho weTheku ngokuhlinzeka ngamathuba emisebenzi nokukhuthaza ukuhwebelana.
Enye yezimpumelelo ezibalulekile kule minyaka emihlanu kube wukuthi uMasipala ukwazile ukubekela eceleni isabelomali esikhethekile sokulungisa ingqalasizinda edinga ukunakekelwa ngokushesha kanye nokuthuthukisa ezinye izinsiza ezisekela ukusebenza kweMoses Mabhida Stadium.
Le misebenzi yokulungisa nokuthuthukisa ingqalasizinda isize ekuqiniseni amazinga okuphepha, yaphinde yaqinisekisa ukuthi inkundla ihlala isesimweni esifanele sokusingatha imicimbi emikhulu yezemidlalo neminye imicimbi eheha izivakashi.
Lezi zimpumelelo zikhombisa ukuzibophezela kukaMasipala weTheku ekuqhubekeni nokunakekela izinkundla nezinsiza ezisezingeni lomhlaba, ngenhloso yokukhuthaza ukukhula komnotho, ukuheha abatshalizimali kanye nokwakha iDolobha elinomdlandla, elithuthukayo nelikwazi ukusimama esikhathini eside.
Umthombo: UMnyango Wezokuxhumana kaMasipala weTheku.
